Sport24.az
Dördüncü turun açılış matçında "Kəpəz" mövsümdə ardıcıl 4-cü məğlubiyyətini aldı. Gəncə təmsilçisi bu dəfə "Səbail"in mövsümdə ilk qələbəsini rəsmiləşdirməsində pay sahibi oldu. Bəs nə oldu komandaya? Niyə "Nizami yurdu"nun təmsilçisi nəinki xala, hətta qol üzünə də həsrətdi?
Səbəblər müxtəlifdir, amma bunların içərisində maliyyənin azalması bəlkə də ön cərgədədi. Maraqlıdır ki, klubun içindən gələn rəsmi açıqlamalarda belə maliyyəyə dair təzadlı məqamlar var. Komandanın baş məşqçisi Adil Şükürov A komandasına ayrılan vəsaitin azaldığını bildirirsə, icraçı direktor Cabir İbrahimov tam əksini dilə gətirib. Maraqlıdı, nə baş verir? Niyə bu cür təzadlı açıqlamalar gəlir "Kəpəz" cəbhəsindən?
Məsələyə aydınlıq gətirmək üçün əvvəlcə, Adil Şükürovla əlaqə saxladıq. Təcrübəli mütəxəssis dediklərinin üstündə dayandı: "A komandasının büdcəsi azalıb. Cabir müəllimin dediklərinə şərh vermək istəmirəm".
Belə olduğu halda, icraçı direktorla da əlaqə saxlamağa zərurət duyduq. İbrahimov da əvvəlcə, dediklərini təsdiqlədi: "Ötən mövsümlə müqayisədə, büdcəmizdə heç bir dəyişiklik olmayıb. Sadəcə, məşqçilərimizin və ötən mövsümdən qalan futbolçularımızın məvacibində artım olub".
Ancaq məsələ burasındadır ki, bu ilin yanvarından vergi sistemində dəyişiklik edildi. Bununla da klublara ayrılan vəsaitin 20 faizi tutulmağa başladı. Elə sabiq ağırlıqqaldırana da bu sualı ünvanladıq ki, büdcə 20 faiz azaldılıbsa, A komandasına ayrılan vəsait necə dəyişməz qalıb? Olmaya hansısa xeyriyyəçi peyda olub və bu fərqi cibindən ödəyib? Bax, bu sualdan sonra Cabir İbrahimov "bəli, A komandasının büdcəsi azaldılıb" cavabını verdi. Başqa sözlə, onsuz da maliyyə sarıdan korluq içində boğulan "Kəpəz"in vəziyyəti ötənilkindən də betər olmasını təsdiqlədi.
O zaman İbrahimovu maliyyənin dəyişməməsinə dair məsuliyyətsiz açıqlama verməyə nə vadar edib? Bu sualın cavabını qoy, oxucular özləri axtarsın. Biz isə yalnız onu qeyd edək ki, ötən mövsüm "Kəpəz"də İlqar Nadiri də yer alırdı, Adil Şükürov da. Ötən mövsüm "Kəpəz" baxımlı oyun da sərgiləyirdi, xallar da qazanırdı. Ötən mövsümlə müqayisədə dəyişən bir tək Cabir İbrahimovun vəzifəyə gətirilməsi olub. Mövsümün startına sayılı günlər qalmış icraçı direktor kreslosuna əyləşdirilməsi ilə "Kəpəz"in məğlubiyyətləri sıralamağa başlaması düşündürücüdü, deyilmi?
CEYHUN ƏLİYEV
