Sport24.az
"Karvan"ın futbolçusu İbrahim Qədirzadənin Sport24.az-a müsahibəsi
- I Liqanın XVI turunda səfərdə "Qəbələ"yə 0:2 hesabı ilə uduzdunuz. Məğlubiyyətə nə səbəb oldu?
- Gərgin və maraqlı oyun alındı. Qələbə qazanaraq mövqeyimizi qorumaq istəyirdik. Məğlubiyyətə səbəb fərdi səhvlərimiz idi. Rəqib də bundan maksimum yararlandı. Az səhv edən qalib gələcəkdi. Belə oyun idi. Təəssüf ki, bizdə alınmadı. Qol epizodları da yaratdıq, iki top dirəkdən qayıtdı. Bunlardan biri qol olsaydı, başqa matça şahidlik edərdik. Heç "Qəbələ"də belə epizodlar olmamışdı. Bəxt biz tərəfdə deyildi. Sonda da məğlub olduq.
- Komandanızın hücumçusu Bəhruz Teymurov oyundan əvvəl saytımıza açıqlamasında "Qəbələ"nin sizdən güclü olmadığını bildirmişdi. Sənin fikrin necədir?
- Hardasa rəqibin oyunlarına baxanada bunu demək olar. Amma hazırda birinci pillədədirlər və digər klublarla arada bəlli xal fərqi var. Bu isə digərlərindən güclü olduğunu göstərir.
- "Karvan" artıq 2-3-cü pillələri bölüşdürür. Səncə, "İmişli"nin sizi keçmək ehtimalı varmı?
- Qarşıda hələ çox oyunlar olacaq. Hətta "3-lüy"ə gəlib çatmaq istəyən 2-3 kollektiv var. İlk növbədə mövsümü ikinci pillədə başa vurmağa çalışacağıq.
- Ardıcıl olaraq iki turda qələbə qazana bilmirsiniz. Təzyiq hiss edirsiniz?
- Qışdan sonra çempionata pis başlamışdıq. "Cəbrayıl" və "Difai" ilə oyunlardakı heç-heçələr planda yox idi. Bu nəticələr bizi pis duruma gətirdi. Amma biz bu vəziyyədən çıxmalıyıq. İnanıram ki, qarşıdakı turlarda qələbələr qazanacağıq.
- Premyer Liqaya favoritlərdən göstərilirsiniz. "Karvan" elitada oynamağa hazırdırmı?
- Hazırkı durumda Premyer Liqaya vəsiqə qazana biləcək mövqedəyik. Həmin yeri təmin etsək, qalanı rəhbərliyin qərarıdır. "Karvan"ın daha əvvəl də bu çempionatda çıxış etdiyini bilirik. Komandanın azarkeşləri, stadionu və bazası var. Ot örtüyünə və stadiona bir az əl gəzdirilsə, "Qəbələ"dən sonra Premyer Liqada çıxış etməyə ən layiq olan "Karvan"dır.
- Premyer Liqada komanda sayı artırılır. Bu qərarı eşidəndə reaksiyan necə oldu?
- Əsas komanda sayının artırılması sevindiricidir. Əsas regionlarda olan azarkeşlər matçlara maraq qatırlar. Klub sayı nə qədər çox olsa, bir o qədər yaxşıdır.
- Bəs legioner limitinin ləğvi barədə nə deyə bilərsən?
- İddialı klublardan başqa digərlərinin 13-15 legioner gətirəcəyinə inanmıram. Amma komanda sayı da artıb. Azərbaycanlı futbolçular çətinlik yaşasalar da, çox gözəl rəqabət yaranacaq.
