Sport24.az
"İmişli"nin İdarə Heyətinin sədri Aqşin Mürsəlov Sport24.az-a müsahibə verib.
- I Liqanın XIV turunda evdə "Qəbələ"yə 1:2 hesabı uduzdunuz. Məğlubiyyətə əsas səbəb nə oldu?
- Bizim üçün çətin qarşılaşma oldu. Belə olacağını da bilirdik. "Qəbələ" yaxşı, güclü komandadır. Premyer Liqa təcrübəsi olan oyunçuları var. Bizimlə oyuna qədər qol da vuraxmamışdılar. Çətin olacağı məlum idi. Futbolçuların mübarizə apardılar, vuruşdular. Epizodlardan yararlana bilmədik, fərdi səhvlərdən qol buraxdıq. Komandanın ümumi çıxışından da razıyıq. Növbəti görüşlərdə daha yaxşı oynayacağımıza ümid edirik.
- Baş məçqçi Fərid Namazov postunda qalırmı?
- Bəli. Mətbuatda onunla yollarını ayırdığımız barədə yazılar oxumuşam. Amma elə deyil. Fərid bəylə yola davam edirik. Xal itirdiyimiz oyunlar olub. Amma hamıya bəllidir ki, "Qəbələ" bu turnirin favoritidir.
- Ötən mövsüm müsahibələrinizin birində əsas hədəfin çempionluq olduğunu söyləmişdiniz. Amma istəyinizə çatmadınız. Bu mövsüm əsas hədəf nədir?
- Kluba sponsor cəlb olunandan sonra məqsədimiz Premyer Liqada çıxış etməkdir. I Liqanın səviyyəsi qalxdığı üçün bu, bir az çətinləşib. Ötən mövsüm "Şamaxı" çempion oldu. Bu dəfə "Qəbələ" əsas namizəddir. Həqiqətən Premyer Liqa uğrunda mübarizə aparmaq çətindir. I Liqa komandalarına qalib gələ bilirdik. "Karvan" da, "İmişli" də xallar itirəcək. Amma Premyer Liqa təcrübəsi olan, ordan aşağı dəstəyə gələn kollektivlə mübarizə aparmaq o qədər də asan deyil. İnkrastruktur məsələlərinə də diqqət ayırırıq. Premyer Liqaya lisenziya almaq və uşaq futbolunu inkişaf etdirmək istəyirik. Amma eyni zamanda komandanı Premyer Liqaya çıxarmaq əsas məqsədlərdəndir. Bu il də hədəfimiz odur. Çempionatda çox oyun qalıb. Hələ heç nəyi bilməz olmaz. Düşünürəm ki, sonuncu turadək çempionluq uğrunda mübarizə gedəcək. Liderin də xal itirdiyi görüşlər olacaq.
- "İmişli" dekabradək ardıcıl qələbələr qazanardı. Amma daha sonra stabil oyun sərgiləyə bilmir. Bunun səbəbini nədə görürsünüz?
- Fasilədən sonra MOİK-lə üz-üzə gəldik. Təlim-məşq toplanışından sonra futbolçular matça köklənməkdə əziyyət çəkirlər. "Karvan" və "Qəbələ" də xal itirdi. Biz də gözlənilməz məğlubiyyətlə üzləşdik. Premyer Liqa təcrübəsi olan oyunçularımız var. Amma nədənsə bir az oyunumuzda problemlər olur. Yenə təkrarlayıram. I Liqa çox çətindir. Bəzən zəif çıxış edən kollektiv bizim komandaya qarşı fərqli motivasiya ilə oynayır. MOİK-i gördünüz. 3:1 hesabı ilə öndə idik. Hansı motivasiya ilə qələbəyə inandılar, biz də anlamadıq. Amma "Karvan"a böyük hesabla uduzdular. Oyunçularımızın motivasiyasının artması üçün əlimizdən gələni etməyə çalışırıq. Ümid edirəm yavaş-yavaş formaya düşəcəyik. Heyətdə gənc oyunçularımız da var.
- Mövsümün sonunda istəyinizə çata bilməsəniz. Klubda hansı addımlar atılacaq?
- Bu barədə düşünmək belə istəmirik. Tam məqsədimiz, hədəfimiz Premyer Liqaya yüksəlməkdir. Ötən mövsümdə də mübarizə aparırdıq. Amma qəbul edirdik ki, stadionumuzla, infrastrukturla bağlı çətinliyimiz var. I Liqada 1-2 il mübarizə aparmağı faciə hesab etmirik. Bura həm də Premyer Liqa üçün yaxşı təcrübədir.
- I Liqada üçüncü yeri tutacaq komandanın Premyer Liqa üçün pley-off oynamaq ehtimalı var. Bu barədə nə deyə bilərsiniz?
- Hazırda üçüncü pillədə qərarlaşdığımız üçün demirəm. I Liqanın səviyyəsinin qalxması Premyer Liqa komandasının aşağı dəstəyə düşməsi ilə reallaşdı. Biz daha əvvəl I Liqa klubu ilə mübarizə aparırdıq, bu gün "Qəbələ" ilə yarışırıq. Hədəfimiz onları məğlub etməkdir. Bütün hər şeyi "Qəbələ" səviyyəsinə gətirmək istəyirik. Buna görə I Liqa inkişaf edir. Son iki mövsümdə də idman prinsipi qorunur. Mənim üçün əsas olan budur. Bunun da qorunacağına inanıram. Pley-off futbolumuz üçün xeyirli olmayacaq. Pley-offda onsuz da I Liqa təmsilçisi məğlub olacaq. I Liqanın lideri də Premyer Liqanın sonuncusuna uduzacaq. Məsələn, hazırda "Səbail" "Qəbələ"ni böyük hesabla məğlub edər.
- Siz daha çox ilk iki pilləni düşünməlisiniz ki, pley-off şansınız olmasın...
- Hədəfimiz də budur. Qarşıda 14 tur var. Çox komandalar xal itirəcəklər. Digər klubların gücləndiyini görürük. Zəif klub yoxdur. Autsayderlər belə ikinci yarıda fərqli oyun sərgiləyirlər. Asan olmayacaq. İnanırıq ki, ilk "3-lük"də olacağıq. Amma pley-offun olacağına da inanmıram. Pley-offu ədalətli hesab etmirəm. Amma biz üçüncü yerə oynamırıq.
