Sport24.az
"Oyuna yaxşı hazırlaşmışdıq. Məqsədimiz ilk turda qələbə qazanmaq idi. Amma alınmadı, bəxtimiz gətirmədi". Bu sözləri Sport24.az-a açıqlamasında "İmişli"nin baş məşqçisi Fərid Namazov deyib.
Gənc mütəxəssis məğlub olmalarına baxmayaraq, futbolçularından razı qaldığını da vurğulayıb: "Matça istədiyimiz kimi başladıq, erkən qol vurduq. Oyunun ilk 30 dəqiqəsi bizim diqtəmiz altında keçdi. Sadədə, 30-cu dəqiqədən sonra fərdi səhvlərə yol verdik ki, nəticədə qapımızda iki qol gördük. Rəqibin oyun tərzini öncədən təhlil etmişidik. Onlar uzun ötürmələrə üstünlük verdiyini bilirdik. Ona görə də 3-cü zonadan rəqibə pressinq tətbiq etməyə çalışdıq. Buraxdığımız iki qoldan sonra hesabı dəyişmək üçün maksimum çalışdıq. Bir neçə yüz faizli qol imkanlarımız olsa da, ya rəqib qapıçı yaxşı oynadı, ya da son nöqtəni qoya bilmədik. İlk oyun həmişə riskli, həyəcanlı, intriqalı olur. Oyun planında yetirmələrimdən razıyam, sadəcə, fərdi səhvlərdən qol buraxıb məğlub olduq. Amma bu səhvlərimizdən nəticə çıxarıb növbəti turlarda qələbə üçün meydana çıxacağıq".
Qeyd edək ki, I Liqanın ilk turunda iddialı "İmişli" debütant "Baku Sportnq"ə 1:2 hesabı ilə məğlub olub.
ABDULLA İSMAYILOĞLU
