Sport24.az
"AFFA-nın qərarından sonra Birinci Liqadan aşağıya bir komanda yuvarlanacaq. "Qaradağ Lökbatan"ın təhlükəli zonadan olması səbəbindən bizə qarşı xüsusi istəkli olacaqlarını bilirdik". Bu sözləri Sport24.az-a açıqlamasında Fərid Namazov deyib.
Birinci Liqada mübarizə aparan "İmişli"nin baş məşqçisi 16-cı tur çərçivəsində qarşılaşdıqları "Qaradağ Lökbatan" üzərində qələbəni şərh edib:
"Qələbə seriyasını davam etdirmək üçün qalib gəlmək istəyirdik. Rəqib komandanın və bizim çoxlu qol epizodlarımız oldu. Narazı olduğumuz məqam hər oyunda 4-5 real epizoddan yararlana bilməməyimizdir. Bunun nəticəsində son dəqiqələrdə təzyiq altında olduq".
Namazov "İmişli"nin məqsədinin Premyer Liqaya yüksəlmək olduğunu da vurğulayıb:
"Son qərarlardan sonra bizim də Premyer Liqaya çıxmaq barədə iddiamız var. Ən azı ikinci yeri tutmaq istəyirik. Məqsədimiz budur".
O, sonda "İmişli"nin növbəti turda rəqibi olan "Mingəçevir"in ikinci dövrədə uğurlu çıxış etdiyini deyib:
"Qarşıda bizi "Mingəçevir"lə çətin oyun gözləyir. Bu tur "Difai"ni minimal hesabla məğlub etdilər. Onların yaxşı baş məşqçisi və futbolçuları var. İkinci dövrədə uğurlu çıxış edirlər. Bundan sonra hər oyun bizim üçün finala bərabərdir".
Qeyd edək ki, "İmişli" 16 turdan sonra ikinci pillədə qərarlaşıb.
