Sport24.az
Dünən "ASCO Arena"da baş tutan "Cəbrayıl" – "İmişli" qarşılaşmasından sonra qonaqların baş məşqçisi Fərid Namazov Sport24.az-a müsahibə verib. Gənc mütəxəssis həm qalib gəldikləri oyunu dəyərləndirib, həm də bizi maraqlandıran başqa sualları cavablandırıb.
- Oyunla bağlı fikirlərinizi bölüşməyinizi istərdik...
- Çətin oyun keçəcəyini gözləyirdik. Rəqibin inadlı müqaviməti ilə yanaşı hava şəraiti də bizə mane oldu. Havalar hələ də çox isti keçir. Adətən belə şəraitdə matçlar 17.00-18.00-da keçirilməlidir. Amma "Cəbrayıl" ilə qarşılaşma saat 13.30-a təyin olundu. Hazırda doğma stadionumuzda oyunları keçirə bilmədiyimizə görə "Cəbrayıl" ilə görüş rəqibin meydanında baş tutdu. İlk 20 dəqiqə bizim üçün ağır keçdi, oyuna köklənə bilmədik. Yalnız 20 dəqiqə sonra tempə düşdük və oyunumuzu tapdıq. Lazımi qolları vurub evə qələbəylə dönməyə nail olduq.
- Komandanız hücum planında bir qədər axsayır. Bu barədə nə deyərdiz?
- Tam zəifik də deməzdim. Sadəcə, əlimizə düşən fürsətlərdən maksimim yararlana bilmirik və ilk turda da bunun acısını çəkdik. Düşünürəm ki, bu çatışmazlığı qarşıdakı oyunlarda aradan qaldıracağıq.
- Gələn həftə MOİK-lə qarşılaşacaqsız. Ordu klubu hələ də qəkləbə üzünə həsrətdi ki, bu üzdən meydana istəkli çıxacaqlar. Həmin matçda nəyə ümid edirsiz?
- Məsuliyyətimizi anlayırıq, qarşıda bizi MOİK ilə daha ağır oyun gözləyir. Biz hər qarşılaşmaya ciddi hazırlaşır, meydana da qələbə üçün çıxırıq. Son 3 turdakı nöqsanlarımızı aradan qaldırıb "hərbiçilər"ə görüşdə də 3 xal üçün oynayacağıq.
- Oyunda komandanızın həkimi ilə dördüncü hakim arasında söz-söhbət yaşandı. Nə baş vermişdi?
- Şişirdiləcək heç nə yoxdu. Sadəcə, mübahisə etdilər. Buna da səbəb istiyə görə su fasiləsinin ləngidilməsiydi. İlk yarıda referi futbolçuların su içməsinə şərait yaratdı. Amma ikinci yarıda sankl yadından çıxardı. Həkimimiz də meydan oyunçularımızın əldən düşməsini görüb buna görə dördüncü hakimə etirazını bildirdi və mübahisə yarandı. Təbii ki, bunun böyüməsinə imkan vermədik. Hakimləri də qınamırıq, onlar da insandılar və nəyisə gözdən qaçıra bilərlər.
ABDULLA İSMAYILOĞLU
