Sport24.az
"Avropa kuboklarında uzun müddətdir çıxış edən güclü rəqiblə qarşılaşacağıq. Ötən mövsümdə "Bayer"ə çətin anlar yaşadıblar". Sport24.az xəbər verir ki, bunu "Dinamo"nun baş məşqçisi Sergey Yakiroviç deyib.
Bosniyalı mütəxəssis Çempionlar Liqasında "Qarabağ"la keçiriləcək ilk oyundan əvvəl təşkil olunan mətbuat konfransında jurnalistlərin suallarını cavablandırıb. O, Azərbaycan çempionunun heyətində təhlükəli futbolçular olduğunu bildirib: "Qarabağ" III mərhələnin cavab matçında 7 qol vurub. Heyətində yaxşı futbolçular çıxış edir və bir-birləri ilə çox əla anlaşırlar. Juninyo, Zubir, Benzia, Romao kimi təhlükəli oyunçuları var. Bu baxımdan oyunda ciddi konsentrasiya olmalıyıq. Evdə azarkeşlərin dəstəyi ilə qələbə qazanıb, cavab matçına daha rahat çıxa bilərik".
Zaqreb təmsilçisinin baş məşqçisi cütün taleyinə ikinci matçda aydınlıq gələcəyini vurğulayıb: "Sabah ilk hissə oynanılacaq. Nəticədən asılı olmayaraq, qalib ikinci matçda bəlli olacaq. Üstəlik, "Qarabağ" sırf Azərbaycan komandası deyil. Heyətdə fransalı, braziliyalı, kolumbiyalı, əlcəzairli futbolçular çıxış edir. Diqqətli olmalıyıq".
Qeyd edək ki, "Maksimir" stadionunda keçiriləcək "Dinamo" - "Qarabağ" matçı saat 23:00-da start götürəcək.
