Sport24.az
"Qəbələ" I Liqanın II turunda "Qaradağ Lökbatan"a 5:0 qalib gəldi. Bölgə təmsilçisinin ən təcrübəli oyunçusu Asif Məmmədov son oyunları və mövsümdəki hədəfləriylə bağlı Sport24.az -a danışdı.
- Çempionatda keçirdiyiniz iki oyunla bağlı fikirlərin maraqlıdır...
- İki tura nəzər yetirsək görərik ki, bu il asan çempionat olmayacaq. Bir qədər boşluq versən, istənilən komanda səndən xal qopara bilər. Keçirdiyimiz iki matça nəzər yetirsək pis çıxış etmirik. Doğma meydanda "Zaqatala"nın müqavimətini qıra bilmədik. Amma səfərdə "Qaradağ Lökbatan"a böyük hesabla qalib gəldik. Hələlik pis irəliləmirik. Amma marafon uzundu, qarşıda bizi daha çətin oyunlar gözləyir.
- Ötən mövsümdə aldığın zədə tam sağalıbmı?
- Şükürlər olsun, sağalıb, hər şey qaydasındadır.
- "Qəbələ", demək olar, yenidən quruldu. Heyətiniz haqqında nə deyərdin?
- Komanda yenidən təşkil olunsa da, yaxşı heyətə sahibik. Ümumi götürəndə demək olar komplektləşmişik. Yeni gələn əcnəbilər var ki, onlar tam uyğunlaşmayıblar. Amma kollektiv olaraq çalışacağıq ki, yeniləri ansamblımıza uyğunlaşdıraq.
- Baş məşqçiniz Kaxaber Tsxadadze deyir ki, komandalar bizə qarşı fərqli motivasiyayla meydana çıxır və istəkli olurlar. Bu da üzərimizdə daha çox təzyiq və məsuliyyət yaradır. Sən bu barədə nə deyərdin?
- Əlbəttə ki, baş məşqçimiz çox düzgün vurğulayır. Çoxları komandamızı çempionatın favoriti hesab etdiyindən bizə qarşı üçqat motivasiyayla oynayırlar. Həqiqətən də işimiz çox çətindir. Kənardan elə görünür ki, guya "Qəbələ" bütün rəqiblərini rahatlıqla sıradab çıxarıb çempion olacaq. Amma elə deyil. Nə meydanda gəzişib qızıl medal qazanmaq mümkündür, nə biz bu düşüncədəyik, nə də rəqiblərimiz buna imkan verər.
- Premyer Liqadakı vəziyyət barədə nə deyərdin?
- Çox maraqlı və döyüşkən çempionat gedir. "Turan Tovuz", "Zirə", "Şamaxı" kreativlik sərgiləməklə güclülər dəstəsinə rəng qatırlar. Bu mövsüm daha rəqabətli və rəngarəng olacağı qənaətindəyəm.
- Səncə, "Turan Tovuz" bu il "Qarabağ"a çempionluq yolunda əngəl ola biləcəkmi?
- Tovuz təmsilçisinin "sükanı arxası"nda zəngin məşqçilik təcrübəsi olan şəxs yer alır. Onların yaxşı heyəti var. Amma nə tovuzlular, nə "Zirə", nə "Sabah"ın "süvarilər" qədər geniş heyətləri, maliyyə gücü və digər bu kimi zəruri imkanları yoxdur. Ona görə, hesab edirəm ki, "Qarabağ"ı uzağı ləngidə bilərlər, amma çempionluq yolundan büdrədə bilməzlər.
ABDULLA İSMAYILOĞLU
