"Ağ-qara" lotereyaya inananlar neçə nəfərdi?

CEYHUN ƏLİYEV

"Lotereya - nikbinlərin dəqiq sayını öyrənmək üçün ən gözəl üsuldu". Bu sözlər SSRİ və Rusiyanın böyük satira ustası Mixail Jvanetskiyə məxsusdu. Ümumiyyətlə, Mixail Mixayloviçin yaradıcılığına zaman-zaman baş vurmağı sevirəm. Bu gün sübh saatlarında onun ölməz ifadələrini vərəqləyərkən məhz bu sözlər diqqətimi çəkdi. Hansısa səs qulağıma pıçıldayırdı ki, bu ifadə o "qoca"nın boyuna biçilib…

Son günlər kimləri gətirməyiblər "Neftçi"nin başına?! Ümumiyyətlə, sirr deyil ki, "ağ-qaralar" və "Qarabağ" haqqında yazılar daim oxucuların diqqət mərkəzində olur. Xəbərin mənşəyi bilinməyən (Əhmədağa əmi yuxusunda görüb sayılmır) məlumatlar həqiqətən sarkazm dolu gülüş doğurur. Azarkeşləri anlamaq olur. Onlar xilaskar axtarır, hər xəbər üzərindən sosial şəbəkələrdə qızğın müzakirə aparırlar.

Bu, elə mövzudu ki, hər bir mətbu orqanı öz əlaqələrini işə salır. Biz də kənarda qalmamışıq və 4 gün əvvəl iki namizədin adını qeyd etmişik ki, bəri başdan deyək ki, böyük ölçüdə heç nə dəyişməyib. Yenə də Samir Abasov və Arif Əsədov baş namizədlərdi. Sadəcə, bir məsələ var ki, "Sumqayıt"ın baş məşqçisini üstün edir: "təbliğat maşını" çox güclüdü.

Həə, qayıdaq yazının ilk cümləsinə. Təkrar yazmayacam, zəhmət olmasa, yazının əvəlinə qayıdın və bir daha diqqətlə oxuyun. Bax, indiki durumda "Neftçi"nin baş məşqçi seçimi lotereya kimi bir şeydi. Hə, nikbinlər (azarkeşlər) çoxdu və güman edirlər ki, bu dəfə çıxarılacaq şarın rəngi "ağ-qara" olacaq. Ancaq şar bir deyil, ikidi, atam balası. Özü də hər iki şar eyni nöqtəni vurmalıdı. Birinci şarın içindən çıxacaq ad baş məşqçiyə məxsusdursa, ikinci şarın içində idarəedici(lər) oturub. Şarın çölü "ağ-qara" rəngə də boyana bilər, başqa birisinə də. Ancaq içi…

Unutmayın ki, ruletkada (Jvanetskinin təbirincə desək lotereyada) udan həmişə kazino olur, uğurlu rəqəmin düşəcəyinə ümid edənlər yox.