Idman.biz
İspaniyanın "Barselona" klubunda icarə əsasında çıxış edən Markus Reşfordun artan performansı ingilis futbol mühitində böyük rezonans yaradıb.
İdman.Biz xəbər verir ki, "Mançester Yunayted"in keçmiş ulduzu, 90-cı illərin tanınmış yarımmüdafiəçisi Qordon Straxan "ESports News"a müsahibəsində Reşfordun həm "Barselona"da, həm də İngiltərə yığmasında son oyunlarda göstərdiyi səviyyəni xüsusi qeyd edib.
O bildirib ki, hücumçunun Premyer Liqanı tərk edib La Liqada yeni həyata başlaması bütün tərəflər üçün doğru addım olub.
Straxan Reşfordun "Mançester"də son dönəmlərdə çətinlik yaşadığını, Ruben Amorimin onun oyununa tam etibar etmədiyini, az oynadığı müddətdə də özünü tam göstərmək şansı olmadığını xatırladıb. Onun sözlərinə görə, mövsümün əvvəlində ayrılıq həm klub, həm də futbolçu üçün ən düzgün qərar idi.
"Bu gün isə vəziyyət tam fərqlidir. Markus Reşford "Barselona" ilə mövsümdə artıq 6 qol vurub və 9 məhsuldar ötürmə ilə yadda qalıb. Onun istedadına heç vaxt şübhəm olmayıb və Flikin rəhbərliyi altında hücumçunun oyununa yenidən güvənim yaranıb", - deyə Straçan bildirib.
Qeyd edək ki, Reşfordun karyerasında dirçəliş fonunda gələcəyi qeyri-müəyyəndir. Onun icarə müqaviləsi 30 iyunda başa çatır. "Barselona" futbolçunu 28 milyon funt-sterlinq (59,4 milyon AZN) qarşılığında birdəfəlik transfer edə bilər. Ruben Amorim isə hələ ki, Reşfordu geri qaytarmaq niyyətində deyil. Katalon klubunun isə büdcə məhdudiyyətləri səbəbilə bu məbləği ödəyib-ödəməyəcəyi sual altındadır.
