Sport24.az
AFFA-nın təşkilatçılığı, UEFA-nın dəstəyi ilə Lənkəranda 14 yaşadək qızlar arasında "Qızlar Futzal Kuboku" keçirilib. Sport24.az xəbər verir ki, Lənkəran Olimpiya İdman Kompleksində təşkil olunan turnirdə 8 komanda iki qrupda mübarizə aparıb.
Qruplarda ilk iki yeri tutan komandalar pley-off mərhələsində üz-üzə gəliblər. 2 nömrəli tam orta məktəb turnirin qalibi olub. II və III yeri müvafiq olaraq 7 nömrəli tam orta məktəb və 4 nömrəli tam orta məktəb tutub. 2 nömrəli tam orta məktəbin şagirdi Mədinə Hüseynova 3 qolla turnirin ən məhsuldar oyunçusu olub. 4 nömrəli tam orta məktəbin şagirdi Nəzrin Kazımzadə ən yaxşı oyunçu, eyni məktəbin şagirdi Rüqayyə İsayeva isə turnirin ən yaxşı qapıçısı seçilib.
İlk üç yeri tutan komandalar diplom və medallar, qalib kollektiv isə kubokla mükafatlandırılıb. Mükafatları AFFA-nın Qadın Futbolu Departamentinin rəisi Əminə Həsənova, qadınlardan ibarət Azərbaycan millisinin baş məşqçisi Siyasət Əsgərov və U-15 (qızlar) millinin baş məşqçisi Gülənbər Qasımova təqdim ediblər.
Qeyd edək ki, layihənin əsas məqsədi gələcəkdə AFFA U-15 Qızlar Liqasına və aşağı yaş qrupu üzrə milli komandalara yeni qız futbolçuların cəlb edilməsidir. İştirakçı komandalar AFFA və UEFA tərəfindən idman geyimi və ləvazimatları ilə təmin olunublar.
