Sport24.az
"Zirə"nin kapitanı Qismət Alıyev "Şamaxı" ilə oyundan sonra Sport24.az-ın suallarını cavablandırıb.
- Misli Premyer Liqasının XXVIII turunda "Şamaxı"nı üç cavabsız qolla üstələdiniz. Oyun barəsində fikirlərini bölüşərdin...
- Rəqibimiz son turlarda çox inamlı çıxış edirdi. Bizi yaxşı komandaya qarşı oyunun gözlədiyini bilirdik. Səfərdə çətin də olsa, 2:1 hesablı qalibiyyət əldə etmişdik. Bu dəfə ilk hissədə istədiklərimizi alındırsa bilməsək də, ikinci yarıda üç qol vuraraq vacib qələbə qazandıq.
- Komanda son olaraq çempionatda "Neftçi"yə məğlub olub. Uğurlu seriyanı nə ilə əlaqələndirərsən?
- Bizim işimiz hər matçda qalib gəlməkdir. Məşqçinin istədiklərini meydanda yerinə yetirmək niyyətindəyik. İlk növbədə kollektivdə nizam-intizam çox vacibdir. Qarşıda bir-birindən vacib görüşlər var. Hazırda bütün fikrimizi növbəti matça yönəltmişik.
- Əsas rəqiblərinizin xal itirdiyini nəzərə alsaq, avrokubok yolunda məqsədə daha da yaxınlaşdığınızı deyə bilərikmi?
- Qarşıda hələ 8 tur var. Çempionatda elə dönəmdir ki, heç bir kollektiv rahatlıqla qələbə qazana bilmir.
- Növbəti oyununuz "Qarabağ"a qarşı olacaq...
- Bizi çətin səfər matçı gözləyir. Ötən mövsümdə çempionatımızda son turadək mübarizə davam edirdi. İndi də oyunlar gərgin keçir. Lakin hazırda yalnız "Qarabağ"la matça köklənmişik.
- "Qarabağ"la aranızda 12 xallıq fərq var. Necə düşünürsən, bəzi oyunda məğlubiyyət və xal itkiləri olmasaydı, daha iddialı "Zirə" görə bilərdikmi?
- Mövsümə çox yaxşı başlamışdıq. Konfrans Liqasında inamlı çıxış edirdik. Lakin zədələrdən qaçmaq mümkün deyil. Aparıcı oyunçularımız bu səbəbdən uzun müddət meydandan kənarda qaldılar. "Qarabağ" neçə ildir ki, istər Avropada, istərsə də, yerli yarışlarda inamlı çıxış edir. Biz də ildən-ilə inkişaf etməyə çalışırıq.
