Sport24.az
"Zirə"nin kapitanı Qismət Alıyev Sport24.az-a müsahibə verib. 27 yaşlı müdafiəçi həm çempionat oyunlarını dəyərləndirib, həm də Konfrans Liqası ilə bağlı fikirlərini bölüşüb.
- Kapitanı olduğun kollektiv uğurlu çıxışla həm avrokubokda, həm də ölkə çempionatında yoluna davam edir. 2024/25 "futbol ili"nə belə başlayacağınızı gözləyirdin?
- Ötən "futbol ili"ndə yaxşı mübarizə aparmaqla həm gümüş medalları əldə etdik, həm də ölkə kubokunun finalçısı olduq. Bu mövsüm də uğurlu seriyanı davam etdirmək fikrindəyik. Ona görə hər iki cəbhədə layiqli mübarizə aparmalıyıq. "Osirek"lə səfərində əldə etdiyimiz heç-heçədən sonra bütün diqqətimizi "Sabah"la oyuna yönəltmişdik. Çox şükür ki, sonda istədiyimizə nail olduq. Konfrans Liqası öz yerində, Premyer Liqanı da unutmaq olmaz.
- "Zirə"nin ştatlı penalti vuranı sən olsan da, istər "Osiyek"lə səfər oyununda, istərsə də "Sabah" matçda "nöqtə"yə Rafael Utziq yaxınlaşdı. Xorvatiya təmsilçisi ilə cavab qarşılaşmasında isə penalti seriyasında şansını boşa verdin. Səbəbi bilmək istərdik...
- "Osiyek"lə səfərdəki ilk oyunun son saniyələrində Utziq penaltini vurmağı çox istəyirdi. Onun doğum günü idi. Məhz bu səbəbdən istəyini reallaşdırmasına mane olmadım. Cavab oyununda isə çox güc sərf etdik. Matçın əsas vaxtında penaltidən rəqibi məyus etdim. Amma "lotoreya"da bunu bacarmadım. Deməzdim ki, bu yorğunluğa görə oldu. Mətbuatda bizi tənqid edirlər ki, "Zirə"nin üç yerli oyunçusu penaltini qaçırdı. Əslində heç kim bundan "sığortalanmayıb". Həmçinin rəqib qapıçının da haqqını vermək lazımdı. O, bəlkə də bizim hara zərbə vuracağımızı öncədən təhlil etmişdi. Hətta bizi pley-offa daşıyan Utziqin zərbəsinin də istiqamətini tapdı. Amma "çıxarda" bilmədi. Əsas odur ki, Tiaqo həmkarından daha üstün oldu və biz pley-offa vəsiqəni təmin etdik.
- "Osiyek"lə cavab matçının bu qədər uzanacağını gözləyirdin?
- Xorvatların oyun tərzindən, mərhələ keçmək istəyindən məlumatlı idik. Düzü, qarşılaşmanın əlavə vaxta gedəcəyini gözləyirdik. Amma penaltilər seriyasınadək uzanacağından ehtiyat edirdik. Çünki, məşqlərdə buna hazırlaşmamışdıq. Əslində matçın taleyini 90 dəqiqədə həl etməyi istəyirdik. Təəssüf ki, alınmadı. Rəqib lazım olan 2 vacib qol vursa da, biz yumruq kimi birləşib xarakter göstərdik və onların pley-off arzularını gözündə qoyduq.
- Hər dəfə hesab geridüşdükdən sonra hansı hissləri keçirirdin?
- Oyundan öncə, rəqibi cərimə meydandan irəlidə qarşılamağı, qapımıza yaxın buraxmamağı planlaşdırmışdıq. "Osiyek"in heyətində cavanlar çox olsa da, hər biri təhlükəli oyunçulardı. Amma istəyimizi reallaşdıra bilmədik. Əlbəttə, hər dəfə bərabərlik qolunu vuranda ruh yüksəkliyi yaşanırdı, şansımızın bitmədiyini anlayırdıq. Volkovun gözəl qolu isə qələbəyə inamımızı daha da artırdı.
- Tiaqo Silvanı "Zirə" - "Osiyek" qarşılaşmasının qəhramanı hesab etmək olar?
- Əlbəttə, pley-offa yüksəlməyimizdə Tiaqonun danılmaz xidməti var. Qəhramanlığa gələndə, komandanın bütün üzvləri bu ada layiqdi. Çünki hamı sonadək döyüşdü, bütün gücünü ortaya qoydu.
ABDULLA İSMAYILOĞLU
