Sport24.az
"Mingəçevir"lə oyunda ilk dəqiqələrdən meydanda diqtə edən tərəf biz olsaq da, bəxtsizliyin qurbanı olduq". Bu sözləri Sport24.az-a açıqlamasında MOİK-in baş məşqçisi Qəzənfər Abbasov deyib.
Gənc mütəxəssis məğlub olmasına baxmayaraq, komandasının dominant futbol oynamasından razı qaldığını da vurğulayıb: "Çox istəkliydik, mövsümə qələbəylə başlamağa motivasiya olmuşduq. İlk dəqiqələrdən xoşbəxtliyi rəqibin qapısı ağzında axtarsaq da, fürsətləri boşa verdik. Hətta qazandığımız penaltini də qola çevirə bilmədik. Belə olduqda ani diqqətsizlikdən istifadə edən rəqib qapımıza yol tapdı. Hesabda geri düşməyimizə baxmayaraq, yenə də ruhdan düşməyib hücumlarımızı davam etdirdik. Fasilədən sonra müdafiəçilərimiz sayını azaltmaqla hücumameyilli oyunçuları döyüşə atdıq. Bundan sonra rəqib bizi əks-hücumda yaxalamaqla 2-ci qolu vurdu. Təəssüf ki, yalnız oyuna əlavə olunan dəqiqədə penalti ilə təsəlli qolunu vurmağa müvəffəq olduq. Yetirmələrimin çıxışından razı qaldım. Məğlub olsaq da, kreativ və dominant oyun sərgilədik. Hücum planında rəqibi üstələdik. Sadəcə, əlimizə düşən fürsətləri qola çevirə bilmədik. Əvəzində isə rəqib əlinə düşən 2-3 qol imkanlarından maksimum yararlandı. Futbolda bəxt amili də var".
Qeyd edək ki, I Liqanın ilk turunda MOİK öz meydanında "Mingəçevir"ə 1:2 hesabı ilə məğlub olub.
