"Qəbələ"nin rəhbəri: "Bu saziş futbolun tərəqqisinə əhəmiyyətli dəstək olacaq"

"Müqavilənin müddəti bir ildir. Bu müqavilənin idmanın və ümumilikdə futbolun inkişafına böyük töhfə verəcəyinə inanıram".

İdman.biz Teleqraf-a istinadən xəbər verir ki, bunu "Qəbələ"nin prezidenti Fariz Nəcəfov SAB şirkəti ilə müqavilənin bağlanılması mərasimində deyib.

O, sözləşmənin sosial məsuliyyət tərəfinə ciddi önəm verdiklərini vurğulayıb: "Hörmətli tərəfdaşımızla futboldankənar məsələlər haqqında da danışdıq. Bu dəstəyin arxasında olan sosial məsuliyyət bizim üçün böyük əhəmiyyət daşıyır. Gənclər və yeniyetmələrimizin sağlam həyat sürmələri, bu yola təşviq olunmaları vacibdir".

Klub rəhbəri növbəti mövsümdə yeni sponsorla müəyyən uğurlara imza atmaq niyyətində olduqlarını vurğulayıb: "Ümidvaram ki, bu müqavilə hər iki tərəf üçün xeyirli və faydalı olacaq".

Daha sonra tərəflər arasında rəsmi müqavilə bağlanılıb. Nəcəfov qarşı tərəfə klubun formasını hədiyyə edib.

Nəcəfov klubun SAB şirkətindən reklam qarşılığında maliyyə vəsaiti almayacağını söyləyib: "Şirkət komandanı qida məhsulları ilə təmin edəcək. Biz isə komanda formalarının qol hissəsində SAB-ın loqosunu və Qəbələ şəhər stadionunda şirkətin bannerlərini nümayiş etdirəcəyik".

O, gələcəkdə əməkdaşlığın daha da genişləndirilməsini istisna etməyib: "Builki əməkdaşlıq uğurlu alınsa, gələn mövsümlərdə Qəbələ şəhər stadionuna şirkətin adının verilməsinə baxıla bilər".

İdman.biz