"Qəbələ"nin legioneri Amoah: "Bir neçə həftəyə daha yaxşı "Qəbələ" görəcəksiniz"

"Qəbələ"nin yeni legioneri İsaak Amoahın Sportinfo.az-a müsahibəsi

- "Zirə" ilə oyuna sürətli başladınız, hesabı açdınız, bir neçə qol epizodu yaratdınız. Məğlubiyyətin səbəbini nədə görürsən?

- İlk hissənin ilk yarısını pis keçirmədik. Lakin son 15 dəqiqədə bəzi səhvlərə yol verdik deyə, rəqib bundan ustalıqla yararlandı. Əlimizdən gələni etdik, mübarizə apardıq. Dediyim kimi, kiçik səhvlərə görə uduzduq. Səhvlərimiz üzərində işləməliyik.

- "Zirə"ylə "Qəbələ"nin arasında bütün mənalarda böyük fərq var. Minimal hesablı məğlubiyyıəti heç-heçəyə bərabər tutmaq olar?

- "Zirə"nin heyətində həqiqətən təcrübəli futbolçular var. Belə olduğu halda onlardan geri qalmamağa çalışırdıq. Hətta bəzi anlarda üstün görünürdük. Qol epizodlarında bəxtimiz gətirsəydi, məcazi yox, həqiqi mənada heç-heçədən danışa bilərdik. Bir neçə həftə birlikdə oynayandan sonra daha yaxşı "Qəbələ" görəcəyinizə söz verirəm.

- Heyətinizdəki gənc futbolçuların sayı kifayət qədərdir. Onların səhvə yol verməsi digər futbolçuların qəzəblənməsinə səbəb olur?

- 18-20 yaşlı futbolçuların xətalar etməsi normaldır. Özüm də o yolu keçmişəm. İnsan öz səhvləri üzərində öyrənir. Xüsusən bu cür təcrübəli komandalara qarşı həyəcanın olması səhvlərə yol açır. Bir də ki, səhvi təkcə gənclər etmir, ən təcrübəli futbolçuların da başına gəlir.

- Komandanın yeni futbolçularla güclənməsi sual altındadır. Bu heyətlə Premyer Liqadakı yeri qorumaq mümkün görünür?

- Heyətin necəliyindən asılı olmayaraq qarşımızda dayanan bir nömrəli hədəf budur. Məqsədimizə çatmaq üçün meydanda canımızı qoymalıyıq. Mövsüm yeni başlayıb, qarşıdakı aylarda çox şeylər baş verəcək. Futbolçu yoldaşlarımın bacarığına və xarakterinə bələdəm. Hədəfin öhdəsindən gələcəyimizə inanıram.

- Azərbaycan elitasında oynamaq çətindir?

- Premyer Liqa yüksək kateqoriya deməkdir. Bu adın özündə böyük məna var. Çempionatda güclü komandalar və keyfiyyətli futbolçular cəmlənib. Çətin olmağına çətindir. Lakin mən işin çətinliyi barədə yox, bunun öhdəsindən gəlmək barədə düşünürəm. Elə etməliyəm ki, "Qəbələ"yə fayda verim.

İdman.biz