Report.az
Bəziləri düşünür ki, legioner limitinin ləğvi Azərbaycan futbolunu məhvə aparacaq. Bu fikirlərlə qətiyyən razı deyiləm.
Bunu "Report"a açıqlamasında I Liqada çıxış edən "Qəbələ" klubunun idman direktoru Səbuhi Səfiyarlı deyib.
O, indiyədək ölkə çempionatında müxtəlif limitlərin olduğunu xatırladıb:
"Legioner limitinin ləğvi haqqında danışanda hər iki mövqeyi müdafiə edənlərin özlərinə görə arqumentləri var. Daha əvvəl 21 yaşadək futbolçular üçün də var idi. Gənc oyunçuların oynaması, şans qazanması, yetişməsi və gələcəkdə yığmaya xeyir verməsi üçün tətbiq olunurdu. Amma bu, baş vermədi. Bütün bunlar ona görə edilirdi ki, yerli oyunçular yetişdirilsin. Amma yenə görürük ki, yığmada "milliləşdirilmiş" futbolçular oynayırlar. Son illərdə də milli həmişə seçmə mərhələlərdə qrup sonuncu olmamaq üçün mübarizə aparırdı. Komanda UEFA Millətlər Liqasında bunu da bacarmadı və D Liqasına düşdü".
S.Səfiyarlının sözlərinə görə, yaxşı yerli oyunçular yenə meydana çıxacaqlar:
"İzah edirlər ki, güya azərbaycanlıların oynamaq şansı olmayacaq. Bunun fərqi yoxdur. Çünki legionerlərin sifarişi üçün elə məbləğlər var ki, onu heç də bütün klublar ödəyə bilməyəcəklər. Ancaq yaxşı büdcəyə malik olanlar verə biləcəklər. Orta və aşağı büdcəyə malik klublar yenə yerlilərdən yararlanacaqlar. Bu, azərbaycanlı futbolçulara da özünü göstərmək şansı verəcək. Bəzi absurd fikirlər səsləndirilir ki, klublar keyfiyyətsiz legionerlər gətirəcək. Bir klub keyfiyyətsiz oyunçunu niyə komandaya cəlb etsin? Hazırkı sirafiş ərizələrində hər klubun 13-14 əcnəbi oyunçusu var. Bundan artıq da olmayacaq. Çünki 13-cü legionerin qiyməti 100 min manatdır. Növbəti mövsümdən klubların əksəriyyəti 13-cü legioneri almayacaq. Keyfiyyətsiz legioner gətirəcəklər? Belə olanda komanda I Liqaya düşəcək. Klub limit olsa və ya olmasa da, legioner cəlb edir. Hansısa şəxsin fikrində başqa şeylər varsa, bunun limitə aidiyyatı yoxdur".
Klub rəsmisi artıq bəzi futbolçuların Azərbaycan pasportuna arxayın olmayacağını söyləyib:
"Limit olduğu dönəmdə bəzi futbolçular layiq olmadıqları klublarda layiq olmadıqları pulu alırdılar. İndi isə öz mövqeyindəki legioneri üstələmək istəyəcək ki, daim oynasın. Bu hardasa yerli oyunçuların keyfiyyətinin artmasına səbəb ola bilər. Hamısına aid olacağını demirəm. Çünki futbolçuların potensiallarını, nəyə qadir olduqlarını bilirik. Artıq azərbaycanlı oyunçular daha çox çalışmağa məcbur qalacaqlar. Bu halları görəcəyik. Çox yanlış fikirdir ki, legioner limitinin ləğvi yerlilərin qarşısını alacaq. Yaxşı oyunçu yenə də oynayacaq, özünə yer tapacaq. Limitin ləğvi yerli futbolçuların qazancına da təsir edəcək. Beləliklə, özlərinə qarşı daha tələbkar olmağa başlayacaqlar. Premyer Liqa klubları limit olduğu üçün yerli futbolçuları icarəyə vermirdilər. Hər zaman azərbaycanlı futbolçu lazım ola bilirdi. Birini oynadırdılar, digərini isə ehtiyatda saxlayırdılar. Artıq belə problem olmayacaq və digər klublara icarəyə veriləcəklər. Komanda sayının 12-yə qaldırılması yerli futbolçuların komanda seçimlərinin artması deməkdir. Premyer Liqaya layiq olmayan isə I Liqada çıxış edəcək. Bu da aşağı dəstənin səviyyəsinin artmasına gətirib çıxaracaq. Əvvəl-axır bunlar baş verməli idi. Yerli futbolçularda çox rahatlıq var idi. Onları silkələmək lazım idi. Belə qərarın verilməsi bəlkə də yaxşı hal olacaq. Məncə, limitin ləğvi uzun müddətli ola bilməz. Yerli futbolçuların səviyyəsi artdıqdan sonra yenidən bu məsələyə qayıtmaq olar. Hər halda, uzun müddət davam etməyəcək. Çempionatda 12 komandanın olması isə son illərdə verilən ən yaxşı qərarlardan biri, bəlkə də birincisidir. Klub sayı mütləq artmalı idi".
Qeyd edək ki, hazırda Premyer Liqada limit "7 legioner + 4 yerli futbolçu" şəklindədir. Fevralın 3-də keçirilən AFFA İcraiyyə Komitəsinin iclasında 2025/2026 mövsümündən etibarən legioner limitinin ləğvi ilə bağlı qərar çıxarılıb. Həmçinin əcnəbi futbolçuların sifarişi üçün rüsumlar tətbiq olunub.
