Idman.biz
"AFFA-nın bu məsələdə ikili standart tətbiq etdiyini düşünürəm. Çünki "Qəbələ" də ötən mövsüm I Liqada çıxış edirdi. İcraiyyə Komitəsinin martın 14-ü verilən qərarında 3 il söhbəti yox idi. Qeyd edilmişdi ki, Premyer Liqada çıxış edən klublara möhlət verilməsi məsələsinə baxılsın. Orada yazılmamışdı ki, "3 il elitada oynamamış". Bu 3 il məsələsini sonradan özləri əlavə etdilər ki, "Qəbələ"yə şamil edilməsin. Bu da çox açıqdır. Klubumuza qarşı fərqli yanaşma var".
İdman.biz xəbər verir ki, bu fikirləri Futbolinfo.az-a açıqlamasında "Qəbələ"nin idman direktoru Səbuhi Səfiyarlı səsləndirib.
AFFA-nın I Liqadan gələn digər komandalar – "Karvan-Yevlax" və "İmişli" barədə güzəşt qərarını yalnız mətbuatdan öyrəndiklərini bildirən funksioner, heç bir rəsmi məlumatın onlara təqdim olunmadığını vurğulayıb: "Qərarı mətbuatdan oxuduq, çünki bizə rəsmi olaraq heç bir məlumat verilmədi. Eyni istəklə müraciətimizin qəbul olunmamasını nə izah edən oldu, nə də bizdən nəsə soruşuldu. Bu, federasiyanın qərarıdır. Məcbur olsaq da, tələbləri yerinə yetirəcəyik. Amma çətinliklər olacaq. U-15, U-17 və əvəzedici heyətimiz Bakıda məşq edəcək. Orada isə həm oyun, həm məşq üçün yer tapmaq olduqca çətindir. Bu barədə məktubda da yazmışdıq ki, daha perspektivli olan 19 yaşlılara fokuslana bilək deyə, əvəzedici heyəti ləğv etməyə icazə verilsin. Bu halda onlara daha yaxşı şərait yarada bilərdik. İndi isə əksinə, digər yaş qruplarına və akademiyaya ayrılan vəsaitin böyük hissəsini əvəzedici heyətə xərcləməli olacağıq".
Səfyarlı klubun yaşadığı çətinliklərə də toxunub: "Bildiyiniz kimi, akademiyada yataqxana sistemini ləğv etmişik və müəyyən məhdudiyyətlər tətbiq olunub. Yaş qruplarımızın bəzilərində əsasən kənardan gələn futbolçular çıxış edir deyə, bu, böyük çətinlik yaradır. AFFA-ya müraciət edərək bildirmişdik ki, komandalarımızdan biri üzrə bizə güzəşt edilsin. Amma mümkün olmadı. İndi məcbur qalıb 15 və 17 yaş qruplarını Bakıdan yarışlara buraxacağıq. Çünki Qəbələdə nə yataqxana təmin edə bilirik, nə də yerli futbolçularla kifayət qədər heyət formalaşır. Əvəzedici komandada isə cəmi 2-3 futbolçumuz var. Keçən mövsüm əsasən gənclərlə oynamışdıq, indi həmin futbolçular artıq 19 yaşlıların çempionatında çıxış edəcək. Federasiyaya məktubla bunları bildirmişdik, xahiş etmişdik ki, bizi də nəzərə alsınlar. Ötən mövsüm I Liqada çıxış edəndə əvəzedici heyət tələbi yox idi, bizdə də yox idi. İndi isə sıfırdan komanda qurmalıyıq. Digər klublara 1 il möhlət verilibsə, bizə də bu imkanı tanıya bilərdilər".
Maliyyə məsələsinə gəldikdə isə, Səfiyarlı mövcud qərarların klublar arasında balansı pozduğunu düşünür: "Hər yaş qrupunun saxlanması üçün azı 80-100 min manat tələb olunur. Əgər klubları bu öhdəlikdən azad etsələr, bu, 300-400 min manat qənaət deməkdir. Əvəzedici heyətin olması isə xərci daha da artırır. Bu qərar bizə rəqabətdə çətinlik yaradır, digər klublara isə üstünlük verir. Biz də maliyyə problemi yaşayırıq. Ona görə akademiyada yataqxana sistemini ləğv etmişik. İnfrastrukturumuz yaxşı olsa da, digər klublara göstərilən dəstək bizə göstərilmədi. Heç bir sahədə güzəşt olunmadı. Bu qərar maliyyə baxımından rəqabət mühitini pozur".
İdman.biz
