Idman.biz
"Qəbələ"də vəziyyət qarışıb. Ardıcıl uğursuz oyunlardan sonra baş məşqçi Kaxaber Sxadadzenin istefası gündəmə gəlib.
İdman.biz futbolinfo.az-a istinadən xəbər verir ki, Premyer Liqada qalmaq uğrunda mübarizədə əsas rəqiblərdən olan "Şamaxı"ya ev məğlubiyyəti azarkeşlərin etirazına səbəb olub. İş o həddə çatıb ki, gürcü mütəxəssis tribunaya hücum çəkərək fanatlarla söz duelinə çıxıb.
Bu durum klubun sahibi olan Tale Heydərovun xoşuna gəlməyib. O, klub prezidenti Fariz Nəcəfovu bu olaya görə danlayıb, gürcü mütəxəssisin özbaşınalığına son qoyulmasını tələb edib. Nəcəfova o da izah olunub ki, Sxadadzenin hər mətbuat konfransında heyətin yetərsiz olduğunu dilə gətirməsi, dolayısı ilə klub rəhbərliyini hədəf göstərməsi bağışlana bilməz.
Əslində, Heydərov haqlıdır. Çünki "Qəbələ"nin elə son turda uduzduğu "Şamaxı" ilə müqayisədə daha yaxşı büdcəsi var. Klub akademiyası bağlandıqdan sonra dövlətin ayırdığı vəsait bütünlüklə əsas komandaya sərf olunur. Bundan başqa, yerli bazadan əldə olunan gəlir də "Qəbələ"yə yönəldilib. Üstəlik, klubun sponsorları 1 milyon dollar yardım edir. Bu qədər dəstəyin qarşılığında yalnız dövlətdən alınan vəsaitlə dolanan "Şamaxı"ya uduzmaq utancvericidir.
Sxadadze elə bu büdcə ilə "Qəbələ"ni I Liqaya endirən məşqçidir. Yenidən elitaya qayıtmaq isə digər klublarla müqayisədə ikiqat artıq olan büdcənin nəticəsidir. Bəli, komandanın heyəti çox gəncdir. Lakin bu yolu da Sxadadze seçib, bacarmayacaqdısa, mövsüm başlamamış istefa verməliydi. İndi deyinmək, azarkeşlə dalaşmaq acizliyin göstəricisidir.
Milli komandalara görə yaranan fasilə Kaxa üçün son şansdır. O, fasilədə komandanı daha yaxşı hazırlamalı, növbəti turdan başlayaraq xallar toplamalıdır. Əks halda, istefa qaçılmaz olacaq. Zatən azarkeşlərlə dalaşan məşqçilərin taleyi bəllidir. Bir neçə həftə öncə Adil Şükürov "Kəpəz"dən məhz fanatlarla xoşagəlməz mübahisədən sonra qovulmuşdu.
Xatırladaq ki, "Qəbələ" 7 turdan sonra 4 xalla 11-ci pillədə qərarlaşıb.
