"Qəbələ" və "Sumqayıt"ın baş məşqçiləri yoxlama oyunundan sonra fikirlərini bölüşüblər

Azərbaycan Premyer Liqasında yeni mövsümə hazırlıq çərçivəsində "Qəbələ" – "Sumqayıt" yoxlama matçı (1:0) keçirilib.

İdman.biz xəbər verir ki, oyundan sonra komandaların baş məşqçiləri fikirlərini bölüşüblər.

"Qırmızı-qaralar"ın çalışdırıcısı Kaxaber Tsxadadze hələ çox işləməli, çox artırmalı olduqlarını deyib: "Yeni futbolçularımız var. Onların da komandaya, oyun üslubuna uyğunlaşma prosesi gedir. Yoxlama oyunları bu baxımdan çox vacibdir. Əlbəttə, səhvlərimiz çoxdur. Üzərində işləməli olduğumuz xeyli məqamlar var. Qalib gəlməyimiz o demək deyil ki, rahat olmaq lazımdır. Rahatlaşmaq əsla yolverilməzdir. Çatışmayan çox nüanslar var. Bundan öncəki matçlarda da yaxşı oynamışdıq. Bu dəfə isə əksər futbolçular 80 dəqiqədən çox meydanda oldular. Hələ çox işləməli, çox irəli getməliyik".

Gürcüstanlı mütəxəssis transferlər məsələsinə də toxunub: "Transferlər də olmalıdır. Bu məsələ hazırda ən vacib məsələlərdən biridir. İdman direktorumuzla yeni transferlərin həyata keçirilməsi üçün çox çalışırıq. Fərqindəyik ki, güclənmək lazımdır. Həm də düzgün istiqamətdə güclənmək".

"Smqayıt"ın baş məşqçisi Saşa İliçin hazırlığın ikinci mərhələsi çərçivəsində ilk yoxlama oyununu keçirdiklərini vurğulayıb: "Oyunumuzda bəzi uğurlu və uğursuz elementlər gördük. Aydın məsələdir ki, fiziki yükləmələr fonunda bəzi səhvlər olur. Bu oyunda da adi vəziyyətlərdə səhvlər etdik və yekunda məğlub olduq. Amma bu, normaldır və düşünürəm ki, günbəgün daha yaxşı olacağıq. Qarşıdakı günlərdə bir neçə keyfiyyətli oyunçunun bizə qoşulması ilə daha güclü komandamız olacaq".

İdman.biz