Sport24.az
Bir neçə saat öncə "Qəbələ" FK akademiyasının fəaliyyətini dondurması haqda məlumat dərc etdi. Həmin andan etibarən furbol ictimaiyyətindən bir "ah" səsi gəldi. Niyə? Çünki bu klub Azərbaycanda "sevilən" statusu əldə edib. Bəli, fəaliyyət göstərdiyi illər ərzində qüsursuz olmayıblar. Ancaq unutmayaq ki, "iş olan yerdə səhv də olur". Bu, məsələnin bir tərəfi.
Digər yandan "qırmızı-qaralar" ötən mövsümdən fərqli, bu il AFFA-nın ayırdığı 700 min manatdan məhrum olub. Lakin assosiasiya elə Estoniya ilə matçdan öncə Qəbələ stadionunun yenidənqurma işləri üçün kifayət qədər vəsait ayırıb və əslində, bu da dəstəyin bir növüdü.
AFFA-dan söz düşmüşkən, onu da qeyd edək ki, ali futbol qurumu "Qəbələ"yə dəstək məqsədi ilə müxtəlif yaş qrupları üzrə yığmalarımız üçün də bu gözəl məkanda təlim-məşq toplanışları təşkil edib. Necə deyərlər, "həm ziyarət, həm ticarət". Ancaq bütün hallarda, "Qəbələ" kimi akademiyanın fəaliyyətini böyük ölçüdə dayandırması arzuolunan deyil.
Bəlkə də alternativ variant kimi klubu əvəzedicilərin çempionatından azad etmək olardı. Ancaq yəqin ki, bölgə təmsilçisi ilə assosiasiya arasında bütün növ müzakirələr gedib ki, bu addımın da mümkünsüzlüyü üzə çıxıb.
Eyni zamanda, onu da qeyd edək ki, "Qəbələ" akademiyası tam bağlanmır. Sadəcə, klub digər bölgələrdən gələn uşaqların yerləşdirilməsi və qidalanmasına şərait yarada bilməyəcək.
Nə deyirik, "pis günün ömrü az olar". İnanmaq istərdik ki, hadisələrin bu cür davamı uzun müddət sürməyəcək. Necə deyərlər, "su gələn arxa bir də gələr..."
