Qarabağ" niyə udizdu və ya Təki yanılım

CEYHUN ƏLİYEV

Uduzdu(q). "Qarabağ"(la) uduzdu(q). İndi sosial şəbəkələr dövrüdür, XX əsrin ortaları yox. Əgər həmin dövrlərdə futbol qurmanları çayçıya yığışıb müzakirələr aparırdılarsa, indi "facebook" bütün təbəqələri qarışdırıb bir-birinə. Gecə saatlarından bəri kütlə ağdamlıların qol imkanlarından istifadə etməməsi, Qurban Qurbanovun əvəzetmə etməməsi, klub rəhbərliyinin transfer bazarında passivliyinə dair statuslarla "alovlandırır". Bir sözlə, ölkə futbolu ilə maraqlananların hamısı yazır və səhv axtarır. Gəlin, biz də gecə məğlubiyyətinin səbəblərini axtaraq...

"Süvarilər" Zaqrebdə rəqibindən demək olar ki, heç bir komponentdə geri qalmırdı. Ancaq realizasiya sarıdan müqayisə etdikdə təyyarə ilə at arabası qədər fərq ortaya çıxacaq.

Qeyd etdiyim komponentin üzərində bir qədər dayanmağa zərurət var. Çünki... Yenə də sosial şəbəkələrə baş vurduqda görürük ki, kütlə "bu qədər qol epizodu yaradıb vura bilməyənlər"i "ağ yuyub qara sərir". Axı, elə həmin Juninyo "Ludoqorets"ə analoji situasiyada qol vura bilmişdi. Bəs, indi niyə topu "göyərçin ovu"na göndərdi?! Niyə Zubir hər zərbə anında yarım addım yubanırdı? Niyə Andradelər həmişə qol vurduqları mövqedən topu ya qapıçının üstünə vurdular ya da yana? Bütün bu sualların cavabı eynidi. Tərəzinin gözündə Çempionlar Liqasının əsas mərhələsi dayanıb. Biz cəmi 3-cü dəfədi bu mərhələdəyik, Zaqreb "Dinamo"su isə... Bəli, "Facebook fenomenləri" ənənəvi olaraq "boş şeydi, dayan qaqan indi sənə başa salar" yaxud "transferlər etmək lazımdı" tipli reaksiyalar verə bilər. Amma məsələyə peşəkar yanaşdıqda aydın olur ki, Çempionlar Liqasının həyəcanını boğmaq üçün Qurban hoca nə qədər dəridən-qabıqdan çıxsa da, bu yetərli deyil. Çümpionumuz ard-arda dəfələrlə bu mərhələyə çatmalıdır ki, özünü pley-offda rahat hiss etsin. O ki qaldı transfer məsələsinə, burda da məsələ kifayət qədər qəlizdi. Məsələn, "Qarabağ" mərkəz hücumçusu aldı. Həmin futbolçu Juninyodan keyfiyyətli olmalıdı. Beləsinə nə qədər vəsait ayrılmalıdır? Tutaq ki, "süvarilər"in ən bahalı futbolçusu 1,5 milyon avro alır. Dediyimiz "mister X" daha üst məbləğ istəyəcək. Belədə, futbolçuların məvacibi arasındakı balans pozulacaq ki, bu da daxildə narazılığa yol açacaq. Deməli, bahalı futbolçu gətirdikdə, bütün heyətinin məvacibi artırılmalıdır. Dolayısı ilə büdcə 30-40 faiz şişməlidi. İqtisadi cəhətdən bu, bir biznesin çöküşü deməkdi. Bəli, yenə də Portuqaliyanın 2-ci divizionundan daha ucuz qiymətə kimisə kəşf etmək olar. Ancaq məşqçilər heyəti beləsini görmürsə, yalandan kimisə 250 min avroya alıb gətirib Qurban Qurbanovun yanında oturtmaq olmaz. Elə hal yaşansa, elə həmin "hərşeyşünaslar" həmin Qurbanovu top atəşinə tutar... Göründüyü kimi, kənardan asan görünən döyüşün içinə daxil olduqda tam fərqli mənzərə yaranır.

Bu paylaşımı sosial şəbəkədə avqustun 6-dan 7-nə keçən gecə etmişdim. Həmin vaxt "Qarabağ" evdə "Ludoqorets"ə 1:2 hesabı ilə məğlub olmuşdu. Yazıda qeyd etdiyim "təmsilçimizin sıralarında yer alan futbolçular ÇL qrupuna psixoloji cəhətdən hazır deyil" ifadəsinin qısa formasını hələ Bakıda Bolqarıstan çempionuna uduzduğumuz matçdan sonra sosial şəbəkədə əks etdirmişdim. Əlbəttə ki, söhbət münəccimlikdın getmir. Sadəcə, bu proqnozun arxasında on illiklərlə ölçülən təcrübə dayanır.

Yazını "facebook"-da qeyd etdiyim son iki sözlə tamamlamaq istəyirəm: təki yanılım.