Idman.biz
"Flikə dedik ki, ola bilsin, yaxın zamanda yenə görüşdük".
İdman.biz xəbər verir ki, bunu "Qarabağ"ın tərcüməçisi Elvar Quliyev "Barselona"nın baş məşqçisi Hansi Fliklə təsadüfən qarşılaşmaları barədə paylaşımında yazıb.
Sosial şəbəkə hesabında Barselonaya səfərini qələmə alan klub nümayəndəsi maraqlı təsadüflə qarşılaşdıqlarını vurğulayıb: "Barselona səfərimizin ilk günündə gözlənilməz sürprizlə üzləşdik. Komandamızın fiziki hazırlıq üzrə məşqçisi Çudomir Çakarovla şəhər mərkəzində gəzişirdik. Birdən Çudo "Dsquared2" mağazası olsaydı, baş çəkərdik" dedi. GPS-lə baxdım, bizdən 800-900 metr aralıda göstərirdi. Gəldik, içəriyə girdik, görürük ki, Hansi Flik qabağımızda durub, telefonda qurdalanır. Çudo ilə bir-birimizə baxdıq, bu qədər təsadüf olar?!
Yoldaşı ilə alış-verişə gəlmişdi. Dərhal yaxınlaşmadıq. Telefonda işini bitirdirdikdən sonra dedik, "bilirik, gün ərzində sizə yaxınlaşanlar, şəkil çəkdirənlər, avtoqraf istəyənlər çox olur". Gülərək bizi qabaqlayıb "heç bir problem yoxdur, gəlin, çəkək" söylədi. Şəkil çəkdirdikdən sonra ona "ola bilsin, yaxın zamanda yenə görüşdük, bəlkə də sizə sürpriz olacaq" dedik. Təəccüblə bizə baxdı, yəgin "bunlar nə danışır?!" düşündü.
Bir az sonra mağazanı tərk etdik. Şokda idik ki, 2 milyon nəfər əhalisi olan Barselonada 1-ci gün qarşımıza necə ola bilər ki, Flik çıxsın.
İki gün sonra "Barselona"nın əsas komandasının məşqini izləyəcək , futbolçular və Flikin özüylə görüşmək imkanımız olacaqdı. Nəhayət, dünən bu, baş tutdu. Flik bizi görəndə duruxdu. Dedik, hə, bizik, o gün mağazada rastlaşmışdıq. Yaxın zamanda görüşərik demişdik. O da "hə, hə əlbəttə xatırladım, yoldaşımla idim özü də" dedi.
Qurban müəllimlə fikir mübadiləsindən sonra onunla daha bir şəkil çəkdirdik. Şəkillərdən biri mağazada, digəri isə "Barselona"nın bazasında çəkilib".
İdman.biz
