Idman.biz
"Qarabağ" mövsümün son ev oyununun biletlərini satışa çıxarır.
İdman.biz xəbər verir ki, bunu Ağdam klubunun mətbuat xidməti açıqlayıb.
Qurban Qurbanovun yetirmələri ardıcıl 4-cü, ümumilikdə 12-ci çempionluğu azarkeşləri ilə - 12-ci oyunçu ilə qeyd edəcək. Misli Premyer Liqasının XXXV turunda "Kəpəz"lə oyununun biletləri bu gün saat 12:00-dan etibarən satışa çıxarılıb. Bu qarşılaşma bitdikdən sonra "Qarabağ"a qızıl medallar və çempionluq kuboku təqdim ediləcək.
iTicket.az-ın "28 və Gənclik Mall"da yerləşən məntəqələri, həmçinin onlayn satışda olan biletlərin qiyməti sektorlara uyğun olaraq dəyişir. Qapıarxası və künclərdə yerləşən sektorlar 3 manat, mərkəzi sektorlar 7 manat, VIP biletlər isə 15 manat təşkil edir.
Azarkeşlər biletləri oyun günü qeyd olunan satış məntəqələrindən, həm də "Azersun Arena"nın kassasından əldə edə bilər. Qapılar azarkeşlər üçün matçın start fitindən 120 dəqiqə əvvəl açılacaq.
Qeyd edək ki, mayın 18-də "Azərsun Arena"da keçiriləcək matç saat 19:00-da başlayacaq.
İdman.biz
