Idman.biz
"Liverpul" və "Qarabağ" arasında çərşənbə günü "Enfild"də keçiriləcək Çempionlar Liqası matçı təkcə "mersisaydlılar"ın yarışın növbəti mərhələsinə yüksəlməsi üçün bir addım deyil, həm də Ağdam klubunun aparıcı oyunçularından birinə özünü göstərmək üçün bir fürsət ola bilər.
İdman.Biz-in rousingthekop.com saytına istinadən verdiyi məlumata görə, "Qarabağ"ın heyətindəki sol cinah müdafiəçisi Toral Bayramov xüsusi diqqət cəlb edir. Çünki o, qarşıdakı matçda əsas rol oynaya bilər.
Endi Robertsonun "Liverpul"dakı gələcəyi ilə bağlı qeyri-müəyyənlik fonunda, Azərbaycan millisinin üzvü "mersisaydlılar"ın klubunda müdafiənin sol cinahını gücləndirmək üçün potensial bir seçim kimi qiymətləndirilir.
Nominal müdafiəçi statusuna baxmayaraq, Bayramov tez-tez cinahda xeyli yüksəkdə hərəkət edir və komandanın hücum oyununa fəal töhfə verir. Bu mövsüm o, artıq bütün yarışlarda səkkiz qol vurub və "Qarabağ"ın ən çox qol vuran oyunçusu olub.
24 yaşlı futbolçu Ağdam klubunda altıncı mövsümünü keçirir, Avropa kuboku yarışlarında xeyli təcrübəyə malikdir və Azərbaycan milli komandasında 30-dan çox oyun keçirib. Bayramov "Qarabağ"da 233 oyunda 37 qol vurub ki, bu da müdafiəçi üçün nadir bir uğurdur.
"Liverpul"un sol cinahını gücləndirməyi düşündüyü və birdən çox mövqe tuta biləcək çox yönlü oyunçular axtardığı bildirilir. Bu kontekstdə Bayramovun İngiltərə nəhənglərinə qarşı oyunu onun üçün bir növ sınaq olacaq.
Əlavə edək ki, "Qarabağ" cari Çempionlar Liqası mövsümündə artıq "Çelsi"dən xal alıb və Ağdam komandası yarışın növbəti mərhələsinə çıxmaq üçün azı 1 xal qazanmaq xatirinə "Enfild"də mübarizə aparmaq niyyətindədir.
Посмотреть эту публикацию в Instagram
