İdman.biz
Avropa Liqasının yeni formatda keçiriləcək Liqa mərhələsində "Qarabağ"ın adları məlum olan 8 rəqibindən 2-si Azərbaycan klublarına tanış komandadır.
İdman.biz "Qarabağ"ın rəqiblərinin klublarımızla rəqabət tarixini nəzərdən keçirib.
Rəqiblərdən İngiltərə "Tottenhem"i "Qarabağ"la 2015-ci ildə Avropa Liqasının qrup mərhələsində qarşılaşıb. Səfər oyununda Riçard Almeydanın 7-ci dəqiqə qolu ilə önə çıxan Ağdam klubu üstünlüyünü qoruya bilməyərək 1:3 hesabı ilə məğlub olub. Bakıda "Tottenhem" Harri Keynin 78-ci dəqiqədə vurduğu qolla minimal hesablı qələbə qazanıb.
"Olimpiakos"la bağlı xatirələr daha yenidir. 2022-ci ildə Avropa Liqasının qrup matçında Pireydə "köhlən atlar"ın 3:0-lıq əzəmətli qələbəsini 68-ci dəqiqədə fərqlənən Ovusu Kvabenanın qolu ardından 82-ci və 86-cı dəqiqələrdə Marko Veşoviçin və Ramil Şeydayevin möhtəşəm qolları təmin etmişdi. Bakıdakı oyunda qapılar toxunulmaz qalmışdı.
Bundan bir il öncə "Neftçi" Pirey təmsilçisi ilə Çempionlar Liqasının 2-ci təsnifat mərhələsində qarşılaşmışdı. Hər iki oyun "Olimpiakos"un 1:0-lıq qələbəsi ilə başa çatmışdı.
Vüqar Məmmədov
İdman.biz
