İdman.biz
Çempionlar Liqası pley-offunda Bakıda "Qarabağ"a qarşı cavab matçına çıxacaq "Dinamo" cari mövsümdə 5 rəsmi oyun keçirib. Bunlardan 4-ü Xorvatiya çempionatında, 1-i isə Zaqrebdə ağdamlılara qarşı qitə yarışında olub.
İdman.biz "Dimamo" futbolçularının bu 5 oyunda statistik göstəricilərini nəzərə çatdırır.
Bu 5 oyunda 10-u legioner olmaqla, 24 futbolçu meydana çıxıb. Lakin onlardan cəmisi 5-i - hücumçular Sandro Kulenoviç və Arber Xoca, yarımmüdafiəçi Petar Suşiç, müdafiəçi Sami Mae və qapıçı İvan Nevistiç bütün oyunlarda iştirak edib. Onların sırasından yalnız qolkiper bütün oyunları əvəzedilmədən meydanda keçirib. Digərlərindən ən çox meydandan olan Sami Maedir – 428 dəqiqə.
"Dinamo"nun 15 qolundan 7-si Sandro Kulenoviçin hesabındadır. Xorvat forvard bu qollardan 2-ni 27 dəqiqə meydanda olduğu Çempionlar Liqası matçında, 5-ni ölkə çempionatında vurub. Kulenoviç 3 matçda dubla imza atıb. Albaniya yığmasının Almaniya doğumlu Kosovo əsilli forvardı Arber Xoca və Şimali Makedoniya yığmasının kapitanı olan müdafiəçi Stefan Ristovski hərəyə 2 dəfə fərqləniblər. Xorvat hücumçular Marko Pyatsa ilə Dario Şpikiç və fransalı müdafiəçilər Ronel Pyer-Qabriellə Kevin Teofil-Katrin hərəyə 1 qol vurublar.
7 qoldan 4-də yarımmüdafiəçi Martin Baturina sərrast ötürmələri ilə iştirak edib. Yerli hücumçu Bruno Petkoviç və kolumbiyalı forvard Xuan Kordoba hərəyə 2 dəfə komanda yoldaşlarına qol vurmaqda kömək ediblər.
5 oyunda komanda 7 sarı vərəqə görüb ki, bunlardan da 2-si Sami Maenin payına düşür.
Qeyd edək ki, evdə "Qarabağ"a 3:0 hesabı ilə qalib gələn "Dinamo" cavab matçına sabah Bakıda çıxacaq.
Vüqar Məmmədov
İdman.biz
