Idman.biz
Ağdamın "Qarabağ" klubunun Çempionlar Liqasındakı rəqibi olan Frankfurtun "Ayntraxt" klubu İngiltərə Premyer Liqasında çıxış edən futbolçunu heyətinə qatmağa hazırlaşır.
İdman.biz "Sky Sport"a istinadən xəbər verir ki, Almaniya klubu "Nyukasl Yunayted"in 22 yaşlı hücumçusu Uilyam Osolanın transferini yenidən gündəmə gətirib.
Frankfurt təmsilçisi yay transfer pəncərəsinin son günündə danimarkalı forvardı 5 milyon avroya icarəyə götürməyi və gələcəkdə 25 milyon avroya futbolçunun bütün hüquqlarını almaq imkanını təklif etmişdi. Lakin "Nyukasl" bu təklifi rədd edib.
İndi isə "Ayntraxt" yanvarda danışıqları bərpa etmək və hücum xəttini gücləndirmək niyyətindədir. Klubun planında Osola ilə Yonatan Burkardın tandemi əsas rol oynayacaq. Bildirilir ki, Osola artıq şəxsi müqavilənin şərtlərini Frankfurt təmsilçisi ilə razılaşdırıb.
O, 2024-cü ilin yayında "Şeffild Yunayted"dən "Nyukasl"a 11 milyon avroya transfer olunub. Cari mövsümdə bütün turnirlərdə doqquz oyuna çıxan Osola üç qol vurub - bunların ikisi Liqa Kubokunda "Bredford"a, biri isə Premyer Liqada "Liverpul"a qarşı olub.
Ötən həftəsonu "Ayntraxt" "Bavariya"ya 0:3 hesabı ilə uduzub və altı turdan sonra doqquz xalla Bundesliqada yeddinci pillədə qərarlaşıb.
Xatırladaq ki, "Qarabağ" - "Ayntraxt" qarşılaşması Çempionlar Liqasının qrup mərhələsinin yeddinci turu çərçivəsində 2026-cı il yanvarın 21-də Bakıda keçiriləcək.
İki turdan sonra Frankfurt klubu üç xalla turnir cədvəlində 15-ci yerdədir. "Ayntraxt" ilk turda evdə "Qalatasaray"ı 5:1 hesabı ilə məğlub edib, ikinci turda isə "Atletiko Madrid"ə eyni hesabla uduzub.
"Qarabağ" isə iki oyundan maksimum nəticə ilə altı xal toplayaraq altıncı sıradadır. Ağdam təmsilçisi startda səfərdə "Benfika"ya 2:3 hesabı ilə qalib gəlib, ardınca Bakıda "Kopenhagen"i 2:0 hesabı ilə məğlub edib.
Teymur Tuşiyev
