Idman.biz
"Qarabağ"da oynamaq uşaqlıq arzum olub".
Bunu İdman.biz-ə "Qarabağ"ın futbolçusu Sadiq Məmmədzadə deyib.
O, komandasının 12-ci çempionluğunu şərh edib. Gənc qolkiper bildirib ki, mövsüm onun üçün olduqca maraqlı keçib: "Bu il "Qarabağ"la ilk çempionluğumu yaşadım. Mövsüm boyu da, indi də xoşbəxtəm. Komanda olaraq əzmkar qələbələr qazandıq. Komandada əhval-ruhiyyə çox yaxşıdır. Həm futbolçularla, həm də baş məşqçimiz Qurban Qurbanovla münasibətlərimiz yaxşıdır. Qurban müəllimin işini sözlə ifadə etmək çətindir. Boşuna ona Azərbaycanın Aleks Ferqyusonu demirlər".
19 yaşlı qapıçı gələcək hədəflərindən də danışıb: "Qarşıma bir neçə məqsəd qoymuşam. Hazırda əsas istəyim "Qarabağ"ın yaxşı qapıçılarından biri olmaqdır. Gələcəkdə legioner həyatı yaşamağı da çox istəyirəm. Avropada çıxış etmək arzusundayam. Kim istəməz ki?".
Qeyd edək ki, "Səbail"in yetirməsi olan Sadiq Məmmədzadə ötən yay "Qarabağ"a keçib.
Aytac Sahəd
İdman.biz
