Idman.biz
"Oyun çox çətin keçdi".
İdman.biz xəbər verir ki, bunu AZƏRTAC-a açıqlamasında "Qarabağ"ın polşalı qapıçısı Mateuş Koxalski Azərbaycan Kubokunun yarımfinal mərhələsinin cavab matçında "Araz-Naxçıvan"a 3:0 hesabı qalib gəldikləri görüş barədə danışarkən deyib.
O, Naxçıvan klubunun yaxşı komanda olduğunu bildirib: "Rəqib meydanda sonadək döyüşdü. Amma xoşbəxtəm ki, 3:0 hesablı qələbə qazandıq. Bəli, iki fərqli hissə oldu. Lakin yaxşı mübarizə apardıq. Hər matçda qalib gəlmək bizim üçün çox önəmlidir. Bu, komandaya yüksək əhval-ruhiyyə verir".
24 yaşlı qolkiper yaxşı mövsüm keçirdiklərini söyləyib: "Liqada çempionluğa doğru gedirik, Azərbaycan Kubokunda finala vəsiqə qazandıq. Mövsümün əvvəlində qarşımıza qoyulan hədəflərə doğru addım-addım irəliləyirik. Avrokuboklara ciddi hazırlaşıb, builkindən daha yaxşı oynamaq istəyirik".
Koxalski Ağdam klubunda xoşbəxt olduğunu vurğulayıb: "Komanda ilə daha ikiillik müqaviləm var. Hazırda bütün fikrimi burada qazanmaq istədiyim uğurlara yönəltmişəm".
Qeyd edək ki, "Qarabağ" iki görüşün nəticəsinə əsasən, Naxçıvan təmsilçisini 3:1 hesabı ilə məğlub edərək finala vəsiqə qazanıb.
İdman.biz
