Idman.biz
"UEFA Çempionlar Liqasının əsas mərhələsinə yüksələn "Qarabağ" futbol klubu oyunlarını Olimpiya stadionunda keçirmək üçün heç bir rəsmi müraciət ünvanlamayıb".
İdman.biz xəbər verir ki, bunu Oxu.Az-a açıqlamasında Bakı Olimpiya stadionun direktoru Fərid Əsədzadə deyib.
"Hazırda stadionun ot örtüyü yoxdur. Bunun səbəbi isə ötən il Bakıda keçirilən COP29 tədbiridir. Həmin tədbirdən sonra stadionda ot örtüyü bərpa edilməyib. Bu il qış ayları sərt keçdiyindən bərpa işlərini də həyata keçirmədik. Daha sonra isə iyul ayında stadionda böyükmiqyaslı tədbirin olacağını bildiyimiz üçün ot örtüyünü bərpa etməməyə qərar verdik. "Qarabağ" klubu da hazırda Olimpiya stadionunda oyunlar üçün rəsmi müraciət ünvanlamayıb. Əgər müraciət ünvanlanarsa, bu məsələ ilə bağlı rəsmi məlumat veriləcək. Ümumilikdə isə stadionun həmin vaxtadək hazır olub olmayacağı barədə nəsə demək mümkün deyil", - deyə F.Əsədzadə bildirib.
Qeyd edək ki, "Qarabağ"ın UEFA Çempionlar Liqasının əsas mərhələdəki rəqibləri bu gün Bakı vaxtı ilə saat 20:00-da keçiriləcək püşkatma mərasimindən sonra bəlli olacaq.
İdman.biz
