Idman.biz
Çempionlar Liqasının (ÇL) əsas mərhələsində əldə olunan uğurlu nəticələr "Qarabağ" rəhbərliyini ümidləndirib.
İdman.Biz sportinfo.az-a istinadən xəbər verir ki, komandanın öz yoluna inamla davam etməsi idarəçiləri səxavət kisəsinin ağzını daha geniş açmağa ürəkləndirib.
Rəhbərlik dördüncü turda "Çelsi" ilə 2:2 oynayan kollektivə ayırdığı mükafat fondunu bir qədər də artırıb. İngiltərə nəhəngindən bir xal alınmasında pay sahibi olan futbolçuların hər biri 90 min dollar qazanıb.
Sonradan meydana çıxanlar bu məbləğin yarısına sahiblənib. Ehtiyatda qalanlar isə göstərilən rəqəmin 25-30 faizi qədər irəli düşüb.
Cari mövsümdə ÇL-də iki qələbə qazanan Ağdam təmsilçisi "Benfika" zəfərinə görə oyunçularına 100 min manatın üstündə ödəmə edib. "Kopenhagen" qalibiyyəti isə onları 70 min manatdan artıq irəli salıb.
Azərbaycan çempionu ilk dörd turdan sonra yeddi xal toplayıb və ümumi turnir cədvəlinin 15-ci pilləsində yer alıb.
