Idman.biz
Çempionlar Liqasının əsas mərhələsində Ağdamın "Qarabağ" klubunun rəqibi olan İngiltərənin "Liverpul" komandası əsas müdafiəçilərindən biri Konor Bredlini itirib.
İdman.Biz "Sky Sports"a istinadla xəbər verir ki, 22 yaşlı futbolçunun ciddi zədə aldığını rəsmi şəkildə açıqlanıb.
Bredli Premyer Liqada "Arsenal"la matçın son dəqiqələrində zədələnib. Yaxın günlərdə müdafiəçi əməliyyat olunacaq və bundan sonra klubun məşq mərkəzində bərpa prosesinə başlayacaq. Onun meydana qayıdışının vaxtı hələ açıqlanmayıb.
Bredlinin mövsümün qalan hissəsini buraxmaq ehtimalı var. Müdafiəçi bu mövsüm bütün turnirlərdə 21 oyunda iştirak edib və iki məhsuldar ötürmə ilə yadda qalıb. Onun "Liverpul"la müqaviləsi 2029-cu ilin yayına qədər nəzərdə tutulub, Transfermarkt-ın məlumatına əsasən isə bazar dəyəri 30 milyon avro təşkil edir.
Qeyd edək ki, "Liverpul" və "Qarabağ" Çempionlar Liqasının əsas mərhələsinin səkkizinci turu çərçivəsində yanvarın 28-də "Enfild" stadionunda qarşılaşacaqlar.
