Idman.biz
Ağdamın "Qarabağ" komandası ilə Çempionlar Liqasında rəqib olan "Çelsi"nin baş məşqçisi Enzo Mareska, komandası İngiltərə çempionatında "Brayton"a 1:3 hesabı ilə uduzduqdan sonra tənqid olunub.
İdman.biz-in məlumatına görə, azarkeşlər klubun son 5 qarşılaşmada cəmi 1 qələbə qazanan qeyri-sabit nəticələrindən narazıdırlar.
Azarkeşlərin təzyiqinə baxmayaraq, "Çelsi" rəhbərliyi Enzoya inamını qoruyur. "The Telegraph" yazır ki, idarə heyəti mövsümün ortasında dəyişiklik etməyi düşünmür və yalnız mövsümün nəticələrinə əsasən Mareskanın performansını qiymətləndirəcək.
İtaliyalı mütəxəssis artıq klub kuboklarını – o cümlədən Konfrans Liqası və FIFA Klublararası Dünya Çempionatında əldə edilən qələbələri qazanmaqla mövqeyini möhkəmləndirib. "Çelsi" rəhbərliyi isə əmindir ki, mövsümün əsas hədəfləri – Premyer Liqada ilk "dördlük"də yer almaq və kubok yarışlarında uğur qazanmaq mümkündür.
Klub eyni zamanda heyətin durumunu çətinləşdirən zədə və intizam problemlərini də nəzərə alır. Ümid edilir ki, əsas oyunçuların geri dönüşü ilə Mareska komandanın çıxışını sabitləşdirəcək və əvvəlki səviyyəsinə qaytara biləcək.
"Aristokratlar"ı narahat edən əsas məqamlardan biri hücum lideri Koul Palmerin yoxluğudur. Futbolçu qasıq nahiyəsindən aldığı zədə səbəbindən təxminən üç həftə yaşıl meydanlardan kənarda qalacaq. Lakin onun noyabrın 5-də Bakıda keçiriləcək "Qarabağ" – "Çelsi" oyununa qədər sağalacağı gözlənilir.
Teymur Tuşiyev
