Sport24.az
Azərbaycan çempionu "Qarabağ" bu mövsüm UEFA Çempionlar Liqasında mübarizəyə II təsnifat mərhələsindən başladı və sonda bütün ölkəyə qürur yaşadan uzun bir yol qət etdi.
Bu, təkcə nəticələrlə deyil, həm də xarakter, inam və böyük səhnədə özünü təsdiqləmə hekayəsi idi.
"Qarabağ" ilk olaraq İrlandiya təmsilçisi "Şelbrun"la üz-üzə gəldi. Səfərdə 3:0 hesablı inamlı qələbə qazanan ağdamlılar Bakıda 1:0-lıq minimal üstünlüklə mərhələni rahat keçdi. Ardınca III təsnifat mərhələsində Şimali Makedoniyanın "Şkendiya" komandası sınağa çəkildi. Səfərdə 1:0, evdə isə 5:1 hesablı parlaq qələbələr "Qarabağ"ın potensialını və oyun intizamını bir daha nümayiş etdirdi.
Liqa mərhələsinə vəsiqə uğrunda son maneə Macarıstanın güclü təmsilçisi "Ferentvaroş" idi. Budapeştdə 3:1 hesablı qələbə qazanan Qurban Qurbanovun yetirmələri Bakıda 2:3 hesabı ilə məğlub olsalar da, iki oyunun nəticəsinə əsasən istədiklərinə nail oldular. Bununla da klub tarixində ikinci dəfə Çempionlar Liqasının əsas mərhələsində iştirak hüququ əldə edildi. 2017/2018 mövsümündə qazanılan ilk təcrübədən fərqli, bu dəfə komanda daha yetkin, daha təcrübəli və psixoloji baxımdan daha hazır idi. Son illər avrokuboklarda müntəzəm iştirak, hətta digər turnirlərdə pley-off mərhələlərinə yüksəliş "Qarabağ"ı Avropa arenasında söz sahibi komandaya çevirmişdi.
Liqa mərhələsi isə əsl futbol nağılına çevrildi. İlk turda Portuqaliyada nəhəng "Benfika"nın 3:2 hesabı ilə məğlub edilməsi böyük rezonans doğurdu. Ardınca Danimarka təmsilçisi Kopenhagen Bakıdan xalsız yola salındı - 2:0. İlk məğlubiyyət İspaniyada "Atletik" (Bilbao) qarşısında qeydə alınsa da (1:3), komandanın oyunu nikbinlik yaradırdı.
Noyabrda isə Bakıda İngiltərə nəhəngi "Çelsi" ilə 2:2 hesablı heç-heçə əldə olundu. Bu nəticə Azərbaycan futbolu üçün xüsusi əhəmiyyət daşıyırdı. Çünki "Qarabağ" daha əvvəl İngiltərə klublarına qarşı keçirdiyi bütün görüşlərdə məğlub olmuşdu. Bu dəfə isə komanda hesabda geri düşsə də, sona qədər mübarizə apardı.
Sonrakı turlarda İtaliyada "Napoli"yə 0:2, Bakıda isə Niderlandın "Ayaks" klubuna 2:4 hesablı məğlubiyyətlər qeydə alındı. Lakin həlledici məqam 2026-cı ilin yanvarında yaşandı. Almaniyanın "Ayntraxt" komandası üzərində 3:2 hesablı qələbə pley-off qapılarını geniş açdı. Bu, təkcə üç xal deyil, həm də xarakter nümayişi idi.
Liqa mərhələsinin son turunda İngiltərədə "Liverpul"a 0:6 hesablı məğlubiyyət qaçılmaz olsa da, "Qarabağ" tarixində ilk dəfə pley-offa yüksəlməyi bacardı. Bu isə artıq Azərbaycan futbolu üçün yeni səhifə idi.
Pley-offda rəqib yenidən İngiltərə təmsilçisi – "Nyukasl" oldu. Bakıdakı 1:6 və səfərdəki 2:3 hesablı məğlubiyyətlə avrokubok macərası başa çatdı. Beləliklə, Britaniyada başlayan nağıl yenə Britaniya torpağında sona yetdi.
Lakin bu sonluq məyusluqdan çox qürur hissi yaratdı. "Qarabağ" göstərdi ki, Azərbaycan klubu da Avropanın ən mötəbər turnirində rəqabət apara, nəhəngləri məğlub edə və tarix yaza bilər. Bu cür uğurlar təsadüf deyil, illərin zəhmətinin, düzgün strategiyanın və inamın nəticəsidir. Yaxın gələcəkdə hansısa komandamızın bu uğurları təkrarlaması asan görünməsə də, "Qarabağ"ın açdığı yol Azərbaycan futbolunun üfüqlərini xeyli genişləndirdi.
