“Qarabağ”ın almaniyalı qapıçısı: “Həyat yoldaşım və mən Bakıda olmağımızdan məmnunuq”

Dünən baş tutan "Qarabağ" - "Ludoqorets" matçından (1:2) sonra ağdamlıların yeni transferi Fabian Buntiç Sport24.az-ın əmədaşının suallarını cavablandırıb.

- Bu gün (dünən) hamı sizdən qələbə gözləyirdi, amma məğlub olduz. Matçla bağlı fikirlərini bilmək istərdik...
- Oyuna yaxşı başlamışdıq. Məqsədimiz meydandan qələbəy ilə ayrılmaq idi. Təəssüf ki, yaratdığımız qol epizodlarını boşa verdik. Əvəzində isə rəqib özünə lazım olan iki qol vurdu. Hesabı öz xeyrimizə dəyişmək üçün irəli atılsaq da, buna nail ola bilmədik. Etiraf etmək lazımdır ki, rəqib də müdafiədə yaxşı qapandı və boşluqlar vermədi.

- Yoxlama matçlarını nəzərə almasaq, rəsmi görüşlərdə ilk dəfə qapında qol gördün...
- Qısaca deyim ki, asan qollar buraxdım. Bunun olmasını istəməzdim.

- Cavab matçı daha da çətin olacaq. Səfərdə "Ludoqoretsi" məğlub edə biləcəksiz?
- Komandamız buna qadirdi. Hələ heç nə bitməyib. Daha da məsuliyyətli olmalı və ilk görüşdə yol verdiyimiz səhvlər üzərində işləyib cavab qarşılaşmasında onları təkrarlamamalıyıq. Biz özümüzə, gücümüzə və rəqibdən üstün oyun sərgiləyib mərhələ keçəcəyimizə inanırıq.

- İki aya yaxındı Azərbaycandasan. Futbolumuz və çempionatımız barədə fikirlərini bilmək maraqlı olardı.
- Sizin futbol ailənizə yeni qoşulmuşam. hazırda konkret nəsə deyə bilmərəm. Bunun üçün gərək çoxlu matçlar keçirim ki, daha detallı fikirlər səsləndirim. Amma ilkin təəssüratım odur ki, futbolunuzda inkişaf görürəm. Sadəcə, çempionat matçlarında da tribunaların tam dolmasını istərdim. İstənilən halda böyük azarkeş dəstəyi altında oynamağın zövqü başqadı.

- Azərbaycan və Bakı haqqında fikirlərin necədi?
- Azərbaycanda ilk dəfədi oluram. İnsanlarınız gülərüz və mehribandı. Həyat yoldaşım və mən Bakıda olmağımızdan məmnunuq. Gözəl şəhəriniz var, burda darıxmaq olmur.

- Milli mətbəximizdə ən çox sevdiyiniz yemək hansıdı?
- Sizin çox zəngin mətbəxiniz var. Bütün təamlarınızı dadmağa çalışıram. Kabablarınızı və ləvənginizi çox sevirəm.

- Qısa müddətdə hansı sözlərimizi öyrənmisən?
- Nuş olsun, yaxşı-yaxşı...

ABDULLA İSMAYILOĞLU