“Qarabağ”dan dörd turun qazancı

Avropa Liqasında çıxış edən "Qarabağ" bu gün Liqa mərhələsinin IV turunun "Bodo Qlimt"lə matçına çıxacaq.

İdman.biz təmsilçimizin avrokubokların əsas mərhələlərindəki ilk 4 turdakı nəticələrini nəzərdən keçirir.

Cari mövsümədək 10 dəfə əsas raunda yüksələn Qurban Qurbanovun yetirmələri buna ardıcıl son 10 ildə nail olub. Ağdam klubu 1 dəfə Çempionlar Liqası, 8 dəfə Avropa Liqası, 1 dəfə Konfrans Liqasında qrup mərhələsində mübarizə aparıb.

Həmin 10 cəhdin hamısında mərhələ 6 turdan ibarət olub. 4-cü oyun artıq II dövrənin ilk turu çərçivəsində baş tutub. Bu dəfə isə "Qarabağ" bu gün Norveçdə "ekvator"a çatacaq.

Məğlubedilməz

"Qarabağ" yalnız bir dəfə ilk 4 turu məğlubiyyətsiz keçib. Həmin vaxt müvafiq dövr üçün rekord sayda – 10 xal əldə edilib. Bunun komandanın daha aşağı hesab olunan Konfrans Liqasında çıxışı ilə də bağlamaq olar. 8 qol vuran və 3 qələbə qazanan "Qarabağ" bu iki göstəricidə də ən yaxşı nəticəsini məhz 2021/22 mövsümündə reallaşdırıb.

Maksimum - "7"

Avropa Liqasının ilk 4 turu üçün rekord xal isə 7-yə bərabərdir. "Qarabağ" buna iki dəfə imza atıb. 2016/17 və 2022/23 mövsümlərində dörd cəmi bir dəfə uduzan komanda iki qələbə qazanmasına sevinib. İki il əvvəl top fərqi də müsbət olub. Bu, Avropa Liqasının dördturluq bölümü üçün yeganə belə hadisədir. Top fərqində Konfrans Liqasındakı rekordu təkrarlayan "Qarabağ" 2022/23 mövsümünün startdakı 4 turunda cəmi 2 top buraxıb.

Antirekordun astanasında

Digər mövsümlərə göz gəzdirsək, bir dəfə 6, üç dfə 4, bir dəfə üç xal əldə olunub. Hər dəfə də heç olmasa, bir qələbə qeydə alınıb. Yalnız iki dəfə 4 qələbəsiz oyun üzücü olub. Bunlardan biri Çempionlar Liqasındakı tarixi çıxış zamanı yaşanıb. Həmin vaxt 4 turda 2 heç-heçə etmək mümkün olub. Mütləq antirekord 2020/21 mövsümündə yaşanıb. İlk 4 turda məğlubiyyətləri sıralayan "Qarabağ" dörd ildən sonra antirekordun astanasındadır. Həmin nəticənin təkrarlanmaması, hətta top fərqinə görə ən uğursuz nəticənin yaşanmaması üçün Qurbanovun komandası Norveçdə xal qazanmalıdır. İlk üç turda "Tottenhem" və "Ayaks"dan üç cavabsız top buraxan, "Malmö"yə 1:2 hesabı ilə uduzan təmsilçimiz "Bodo Qlimt"ə məğlub olmamalıdır. 3-cü dəfə qələbəsizlik seriyası yaşanmaması üçün isə Norveç klubunu dayandırmaq zəruridir. Bodo şəhərinin təmsilçisi yeni formatda keçirilən turnirin Liqa mərhələsində uduzmayıb.

Qeyd edək ki, "Bodo Qlimt" – "Qarabağ" görüşü Bakı vaxtı ilə saat 21:45-də başlayacaq.

2014/15	AL	1	1	2	2-4	4
2015/16	AL	1	1	2	3-5	4
2016/17	AL	2	1	1	6-7	7
2017/18	ÇL	0	2	2	2-9	2
2018/19	AL	1	0	3	1-6	3
2019/20	AL	1	1	2	7-8	4
2020/21	AL	0	0	4	3-9	0
2021/22	KL	3	1	0	8-3	10
2022/23	AL	2	1	1	7-2	7
2023/24	AL	2	0	2	3-6	6