İdman.biz
"Qarabağ"ın Çempionlar Liqasının pley-offundakı rəqibi Zaqreb "Dinamo"su xorvat futbolunun şəksiz lideri, son 19 ölkə çempionatından yalnız birində (2016/2017) çempion ola bilməyərək gümüş medalla kifayətlənən bir klubdur.
İdman.biz xəbər verir ki, qitənin ən nüfuzlu klub turnirində 8 dəfə qrupda oynayan zaqreblilər bunun 6-nı son 12 mövsümdə edib. Lakin bunların heç birində növbəti mərhələyə adlaya bilməyib.
Ümumiyyətlə, "Dinamo" Çempionlar Liqasında 156 oyunundan 66-da qalib gəlib, 58-də uduzub. Top fərqi 235-214-dür. Bu yarışın qrup mərhələsindəki 48 oyununda nəticəsi 33-103 top fərqi ilə 6 qələbə, 8 heç-heçə 34 məğlubiyyətdir. Komanda bu 8 qrupun 2-də 1 xal belə toplaya, onlardan 1-də isə, ümumiyyətlə qol belə vura bilməyib.
Avrokuboklarda zaqreblilər 375 oyunda 154 qələbə qazanıb, 142 dəfə məğlub olublar. Top fərqi 547-478-dir.
Ötən mövsümdə "Dinamo"nun Çempionlar Liqasında yolunu III təsnifat mərhələsində yunan AEK-i kəsib (1:2, 2:2). Ardından Avropa Liqasının pley-offunda bunu Praqa "Sparta"sı edib (3:1, 1:4). Yolunu Konfrans Liqasında davam etdirən klub qrupu və 1/16-də ispan "Betis"ini adlasa da (1:0, 1:1), 1/8 finalda yenə yunan səddinə ilişib. Bu dəfə yolu kəsən PAOK olub (2:0, 1:5).
Hazırkı mövsüm Çempionlar Liqasında isə "Dinamo" ilk oyununu "Qarabağ"a qarşı keçirəcək.
Xorvat komandasının son oyunları bu ay start götürən ölkə çempionatının ilk 3 turundakı matçlar olub. Zaqreb təmsilçisi ardıcıl olaraq "İstra"nı (5:0), "Osiek"i (2:1) və "Şibenik"i (3:0) üstələyərək maksimum nəticə ilə vahid liderlik edir.
Bu 3 oyunda 10 dəfə fərqlənən "Dinamo" cərimə meydançası daxilindən 36 zərbədən 9-nu, cərimə meydançası xaricindən isə 13 zərbədən 1-ni qola çevirə bilib. 8 qol sağ ayaqla, 2 qol başla vurulub.
Orta hesabla hər oyuna qapıya 16,3 zərbədən 7-si qapı çərçivəsinə vurulub, zərbələrin bloka alınma göstəricisi isə 5,7-dir.
Orta hesabla 69,7 % topa sahib olmaya malik "Osiyek"də ötürmələrin 88,56 faizi dəqiq olub. Uzun ötürmələrin 57,1 faizi hədəfə çatıb.
Təkbətək mübarizələrin 45,3 %-də üstün olan Zaqreb futbolçuları, hava mübarizəsində daha yaxşıdırlar – 57,1 %.
Hər oyuna orta hesabla 1 dəfə offsayda düşən "Dinamo"çular, 12 dəfə fol edirlər.
Müdafiədə hər oyuna orta topalma 11, qapıçı seyvi 1-dir.
Qeyd edək ki, "Dinamo" Çempionlar Liqası pley-offunda avqustun 20-də "Qarabağ"ı qəbul edəcək, 28-də isə ağdamlıların Bakıda qonağı olacaq.
Vüqar Məmmədov
İdman.biz
