Idman.biz
Avrokubokda işləri qaydasında gedən "Qarabağ" heyətin gücləndirilməsi üçün çalışmaları gücləndirib. Avropa Liqasının qrupunda oynayacağı dəqiq olan, Çempionlar Liqasında Liqa mərhələsinin bir addımlığına yüksələn ağdamlılar yarımmüdafiə və hücum xətti üçün oyunçu axtarır.
İdman.biz Futbolinfo.az-a istinadən xəbər verir ki, pley-offda "Ferensvaroş" üzərində səfər qələbəsindən sonra vəzyyət bir qədər də dəqiqləşib.
Klub rəhbərliyi macarların Bakıda revanş edə bilməyəcəyinə inanır. Bu səbəbdən cavabdeh şəxslərə oyunçu axtarışlarını sürətləndirmək və tərəddüd edənlər üçün maliyyə şərtlərini yüksəltmək tapşırığı verib. "Ferensvaroş" üzərində tam qələbə təmin olunan kimi yeni transferlərin heyətə cəlb edilməsi üçün səylər artırılacaq.
Baş məşqçi Qurban Qurbanov heyətdə rotasiya imkanlarını artırmaq üçün hücumun arxasında oynayan yarımmüdafiəçi sorağındadır. Bu mövqedə çıxış edən Kadi Borgesdən Macarıstandakı görüşdəki kimi bəzən sağ cinahda yararlanmaq niyyətində olan çalışdırıcı həm də brazilyalıya rəqabət yaradacaq legioner istəyir. Namizədlər müəyyənləşdirilib, danışıqlar davam edir.
"Qarabağ"ın əsas hədəfi isə mərkəz hücumçusudur. Ağdamlılar Andre Klovisin transferinə ümidini itirməyib. Portuqaliyada "Akademika"nın şərəfini qoruyan brazilyalı hələ də başqa komandaya keçməyib. Onun Çempionlar Liqasında oynamaq şansı yarandığı üçün nəhayət ölkəmizə gələcəyi gözlənilir. "Ferensvaroş"la cavab matçı bitən kimi ona son təklif göndəriləcək.
Olavio Juninyonun "Qarabağ"a dönüşü də istisna deyil. Çempionumuzun "Flamenqo"ya 5 milyon avroya satdığı forvard Braziliya klubunda heyətə düşmədiyi üçün xoşbəxt deyil. Klubu onu icarəyə göndərməyə hazırlaşır. Belədə məhz ÇL amilinə görə forvardın "Qarabağ"a dönüşü də mümkündür.
Daha bir neçə oyunçu ilə danışıq aparan "Qarabağ"da hər şey komandanın ÇL perspektivindən asılıdır. Liqa mərhələsinə vəsiqə təmin olunan kimi transferdə həlledici addımlar atılacaq. Transfer pəncərəsinin bağlanmasınadək azı iki keçidin rəsmiləşəcəyi dəqiqdir.
İdman.biz
