İdman.biz
Bu gün avrokuboklarda 68-ci qələbəsi üçün 178-ci matçına çıxacaq "Qarabağ" əvvəllər səfər qələbəsi qazandığı 13 rəqabətdən 12-dən sonra mərhələ adlayıb.
İdman.biz "Qarabağ"ın qitə turnirlərində evdən kənardakı belə oyunlarını nəzərdən keçirib.
"Köhlən atlar"ın yeganə uğursuz təcrübəsi 2019-cu ildə Çempionlar Liqasının 3-cü mərhələsində olub. Kiprdə "Apoel"i 2:1 hesabı ilə məğlub edən Ağdam klubu evdə 0:2 hesabı ilə uduzub.
Çempionlar Liqasında debütünü 2014-cü ildə 2-ci mərhələdə Maltada "Valetta" üzərində 1:0-lıq qələbə ilə qeyd edən komandamız evdə rəqib qapısından 4 cavabsız top keçirib. 4 il sonra Lyublyanada "Olimpiya"nı 1-ci mərhələ matçında yeganə qolla üstələyən ağdamlılar sloveniyalılarla cavab oyununda qolsuz heç-heçə ilə növbəti mərhələyə yüksəlib. Ötən mövsümün birinci mərhələsində isə Qurban Qurbanovun komandası indiki rəqib "Linkoln"u Cəbəllütariqdə 2:1 hesabı ilə məğlub etdikdən sonra Bakıda 4:0-lıq qələbə qazanıb.
"Qarabağ" Avropa Liqasında ilk matçda qələbə qazandığı 8 rəqabətin hamısında mərhələ adlayıb. Komandamız bu 8 rəqabətin 6-da ev oyununda qalib gəlməklə, 2-də heç-heçə etməklə istəyinə nail olub.
1 dəfə də İntertoto Kubokunda səfər qələbəsi ardından ev məğlubiyyəti Ağdam klubuna mərhələ adlamağa mane olmayıb.
Qeyd edək ki, 1 həftə öncə "Linkoln"a Cəbəllütariqdə 2:0 hesabı ilə qalib gələn "Qarabağ" bu gün Bakıda cavab matçına çıxacaq.
Vüqar Məmmədov
İdman.biz
