Report.az
Azərbaycanı layiqincə təmsil etməyə çalışacağam.
Bunu "Report"a açıqlamasında "Qarabağ"ın mətbuat xidmətinin rəhbəri Anar Hacıyev Avropa Klublar Birliyinin (ECA) Azarkeşlərlə İş üzrə İşçi qrupuna (Fans Working Group) üzv seçilməsi barədə danışarkən deyib.
Futbol funksioneri yeni fəaliyyətə başlayan qrupa üzv seçilməyin həyəcanverici olduğunu söyləyib:
"Klub tərəfindən namizədliyim irəli sürülmüşdü. Daha sonra ECA-da səsvermə nəticəsində qrupa üzv seçildim. Təbii ki, seçilməyənlər də oldu. Bu səbəbdən özümü şanslı hesab edə bilərəm. Cəmi 20 ölkənin təmsilçiləri qrupa üzv ola bildilər. Yəqin ki, araşdırılıb və kim xeyir verə bilərsə, onlara üstünlük verilb".
O, 2023–2027-ci illəri əhatə edən dövrdə sözügedən qurumun fəaliyyətinin Azərbaycan futbolu üçün xeyirli olacağına inandığını bildirib:
"Nəzərdə tutulub ki, mövsümün sonuna qədər qrup üzvləri bir araya toplaşsın və azarkeşlərlə iş üzrə müəyyən məsələlər müzakirə edilsin. Həmin iclasda bütün detalları öyrənəcəyik. İndidən nəsə demək çətindir. İnanıram ki, Azərbaycan futbolu üçün yararlı işlər də ortaya çıxacaq. Öz növbəmdə Azərbaycanı layiqincə təmsil etməyə çalışacağam".
Qeyd edək ki, A.Hacıyev 25 ölkədən irəli sürülən namizədlər arasından qrupa üzv olmaq hüququ qazanıb. O, qrupun tərkibində "Yuventus", "Tottenhem", "Çelsi", "Betis", PSV, "Leyptsiq" kimi klublardan olan mütəxəssislərlə birlikdə yer alacaq. İşçi qrupun əsas missiyası Avropa futbolunda azarkeşlərin təcrübəsini yaxşılaşdırmaq, onların klublarla münasibətlərini gücləndirmək və yeni fan-loyallıq modelləri üzərində işləməkdir. İşçi qrup azarkeş mədəniyyətinin inkişafı, bilet və stadion təcrübəsi, rəqəmsal kommunikasiya və sosial media strategiyaları, gənc nəslin klublarla daha sıx əlaqəsinin qurulması kimi sahələrdə fəaliyyət göstərəcək.
