Sport24.az
"Şükürlər olsun ki, bu matçda da qələbə qazandıq". Bu sözləri Sport24.az-a açıqlamasında "Qarabağ"ın futbolçusu Abbas Hüseynov deyib.
29 yaşlı cinah müdafiəçisi "Kəpəz"ə üç cavabsız qolla qalib gəldikləri Misli Premyer Liqasının 35-ci turunun oyunundan sonra təəssüratlarını bölüşüb:
"Çempionluq mükafatını almamışdan əvvəl qələbə qazandığımız üçün sevincliyik. Amma hələ heç nə bitməyib, mövsüm davam edir. Bundan sonra çempionatda bir matçımız qalır. Ardınca Azərbaycan Kubokunda final görüşünə çıxacağıq. Hər iki qarşılaşmada qalib gəlməyimizi çox istəyirəm. Hədəfimiz mövsümü iki kubokla başa vurmaqdır".
Qeyd edək ki, mayın 31-də Mehdi Hüseynzadə adına Sumqayıt şəhər stadionunda baş tutacaq Azərbaycan Kubokunun finalında "Qarabağ" "Sabah"la üz-üzə gələcək.
