Idman.biz
Ağdamın "Qarabağ" klubu futbol üzrə Çempionlar Liqasının əsas mərhələsinin dördüncü turunun yekunlarına əsasən göstəricilərdən biri üzrə ən yaxşı komandalar arasında yer alıb.
İdman.Biz-in məlumatına görə, Qurban Qurbanovun komandası topa nəzarəti geri qaytarmaq sayında üçüncü pillədə qərarlaşıb – "atlılar"ın aktivində 190 belə epizod var.
"Qarabağ" bu göstəricidə ikinci pillədəki Belçika təmsilçisi "Union"dan cəmi bir epizod geridə qalır. Birinci yerdə isə "Qarabağ"ın üçüncü turdakı rəqibi - İspaniyanın "Atletik Bilbao" klubu qərarlaşıb. Bu komandanın aktivində 202 topu geri qazanma epizodu var. Xatırladaq ki, ağdamlılar basklarla oyunda 1:3 hesabı ilə məğlub olublar.
Birinci üçlüyün ən yaxın izləyiciləri sırasında İngiltərənin "Nyukasl"ı (188), Kiprin "Pafos"u (169) və Danimarkanın "Kopenhagen"i (166) yer alır.
Bununla yanaşı, "Qarabağ"ın hücumçusu Kamilo Duran məhsuldar ötürmələrin sayına görə 5-28-ci yerləri bölüşdürür. Onun aktivində iki asist var.
Xatırladaq ki, Ağdam klubu dörd turdan sonra yeddi xal toplayaraq turnir cədvəlində 15-ci pillədə qərarlaşıb. Qurban Qurbanovun yetirmələri növbəti oyunlarını 25 noyabrda səfərdə İtaliya çempionu "Napoli"yə qarşı keçirəcəklər.
Teymur Tuşiyev
