Idman.biz
"Qarabağ" UEFA Çempionlar Liqası əsas mərhələsinə doğru irəliləyir.
Azərbaycan çempionu Skopyedə 1:0 hesabı ilə qalib gəldiyi "Şkendiya" səddini uğurla keçsə, sonrakı rəqib könə tanışlardan biri olacaq. Son üç ildə həm "Ferentsvaroş", həm də "Ludoqorets"i mübarizədən kənarlaşdıra bilib - özü də evdə onlarla bacarmasa da, səfərdə inamlı qələbələr qazanıb (müvafiq olaraq, 3:1, 7:2). Rəqiblər vaxtilə aldıqları "futbol dərsi"ndən nəticə çıxarıblarmı?
Bu mövsüm avrokuboklarda ardıcıl üçüncü qələbəsini qazanan "Qarabağ"a Şimali Makedoniya təmsilçisi böyük problem yaradacaq gücdə deyil. Bizim çempion vaxtilə bunu "Metalurq Skopye" (1:1, 5:2, 1:0, 2:0) və "Sileks" (4:0) kimi komandalarla oyunlarda sübut edib.
"Şkendiya"ya gəlincə, oyun ərzində qapı çərçivəsinə zərbələrin sayında meydan sahiblərinin 7-6 hesablı üstünyü qeydə alınsa da, qonaqların qapısı qarşısında qol vəziyyətləri, demək olar ki, yaradılmadı.
Rəqibin futbolçuları texnikalı olsalar da, Avropa təcrübələrinin azlığı aşkar sezilirdi. Xüsusilə geydiyi 11 nömrəli formaya uyğun olmayaraq, cinah müdafiəçisi mövqeyində oynayan və adı ilə diqqət çəkən yamaykalı Ronaldo Vebsterin birinci hissədə meydanın mərkəzində "Qarabağ"ın bir neçə futbolçusunu driblinqlə keçməsi alqışalayiq idi.
"Şkendiya"nın ən təcrübəli futbolçusu Besart İbraimi avrokuboklarda ümumilikdə 29 qol vurub, halbuki "Qarabağ"da belə məhsuldarlığı indiyədək heç kim göstərə bilməyib. Amma yaşı 39-a çatmaqda olan hücumçudan əvvəlki çıxışı gözləmək sadəlöhvlük olardı.
90 dəqiqə boyunca oyuna nəzarət edən "Qarabağ" da kifayət qədər qol vəziyyətləri yaratmasa da, rahatlıqla istədiyi nəticəni əldə edə bildi. Komandanın döyünən ürəyi Marko Yankoviçin də zədəsini sağaldaraq qayıdışı müsbət məqamlardandır.
Yeni transferlərdən start heyətində yer alan braziliyalı yarımmüdafiəçi Pedro Bikalyo hələ ki, ümidləri doğrultduğundan baş məşqçi Qurban Qurbanov bu mövsüm hər üç oyunda ona güvənib. İkinci hissədə kot d"vuarlı yarımmüdafiəçi Kris Kuakuya da şans verildi. Yenilərdən mərakeşli mərkəz müdafiəçisi Sami Mmaee və braziliyalı sağ cinah müdafiəçisi Dani Bolt isə ehtiyatda qaldılar. Ən yeni transfer - ispaniyalı yarımmüdafiəçi Xoni Montiel isə "Şkendiya" ilə oyunlar üçün iştirak ərizəsində, ümumiyyətlə, yer almayıb.
Mənfi cəhət kimi ötən mövsümün bombardiri Leandro Andradenin "dişsizliy"ini qeyd etmək mümkündür. Hücumda Nəriman Axundzadənin ümidinə qalan komanda isə Çempionlar Liqasında "nəsə edə" bilməz.
Kadi də əvvəlki formasından uzaqdır və tez-tez səhvlərə yol verirdi. Amma Qurban Qurbanov deyir ki, "bu gün bunu müzakirə etməli deyilik, çünki rəqibin gücünü də nəzərə almaq lazımdır". Bununla belə, baş məşqçi etiraf edir: "Ola bilər bəzi epizodlarda zəif təsir bağışladı". Səbəbini də açıqlayır: "Ona qarşı rəqib müdafiəçilər daha çox diqqət ayırırdılar. Hər oyunçu 90 dəqiqə eyni səviyyədə oynaya bilməz".
Bu da Qurban Qurbanovun ilk oyun və cavab qarşılaşması ilə bağlı fikirlərinin qısa xülasəsi: "Səfərdə qələbə qazanmaq çox vacib idi. Oyun ərzində səhvlərimiz çox olsa da, yekunda lazım olan nəticəni qazana bildik. Bakıda "Şkendiya"ya qarşı daha diqqətli oynamalıyıq. Çünki qarşımızda məğlub olmağı sevməyən bir komanda var".
Qarşıda hələ, necə deyərlər, bir yarım mərhələ var. "Qarabağ" 2017-ci ildən sonra ilk dəfə Çempionlar Liqasının əsas mərhələsinə qatılmağa yaxındır. Amma hazırkı heyətlə orada heç də asan olmayacaq...
Rasim Mövsümzadə
İdman.biz
