Idman.biz
Qurban Qurbanovun baş məşqçisi olduğu "Qarabağ" futbol klubu tarixində ilk dəfə Avropanın əsas avrokubok turnirini hesab olunan Çempionlar Liqasının qrup mərhələsinə ardıcıl iki qələbə ilə başlayıb.
İdman.biz xatırladır ki, Ağdam klubu ötən gün Çempionlar Liqasının ikinci turunda Bakıda Danimarkanın "Kopenhagen" komandası üzərində 2:0 hesablı inamlı qələbə qazandı.
Qolların müəllifi Zubir və Addai oldu. İki turdan sonra ağdamlıların altı xalı var və "köhlən atlar" turnir cədvəlinin altıncı pilləsində qərarlaşıb.
Əvvəl yalnız Avropa Liqasının 2023/2024 mövsümündə Qurban Qurbanovun komandası əsas mərhələyə iki qələbə ilə başlaya bilmişdi. Həmin mövsüm "Qarabağ" evdə "Molde"yə (Norveç), səfərdə isə "Hekken"ə (İsveç) qalib gəlmişdi. Hər iki oyun Azərbaycan klubunun minimal hesablı qələbəsi ilə yekunlaşmışdı. Çempionlar Liqasının 2017/2018-ci il mövsümünün əsas mərhələsində isə Qurban Qurbanovun yetirmələri bütün qrup mərhələsində cəmi iki xal toplayaraq, qrupu sonuncu pillədə başa vurub.
Beləliklə, "Benfika" üzərində 2:3, Bakıda isə "Kopenhagen" üzərində qələbədən sonra "Qarabağ" Avropanın əsas futbol turnirində rekordlar vurmağa davam edir.
Xatırladaq ki, "Qarabağ" ötən mövsüm Avropa Liqasının əsas mərhələsində keçirdiyi 8 oyunda cəmi 3 xal toplaya bilmişdi.
Məlumat üçün əlavə edək ki, Ağdam klubu cari Çempionlar Liqasında növbəti oyununu oktyabrın 22-də səfərdə "Atletik Bilbao"ya qarşı keçirəcək.
Teymur Tuşiyev
