Idman.biz
Ağdamın "Qarabağ" klubu Avrokubokların əsas mərhələsinin ilk dörd turu üzrə topladığı xal və vurduğu qollar baxımından tarixinin ən güclü mövsümlərindən birini keçirir. Turnirin səviyyəsi və Çempionlar Liqasının statusu nəzərə alındıqda isə bu, klub tarixinin ən uğurlu göstəricisidir.
İdman.Biz xəbər verir ki, Çempionlar Liqasının qrup mərhələsində dörd turun yekununa görə Qurban Qurbanovun komandası yeddi xal toplayıb və səkkiz qol vurub. Hər iki göstərici klubun Avropa turnirləri tarixindəki ən yaxşı nəticələr sırasındadır.
Toplanan xal sayına görə bu nəticə Avropa Liqasının 2016/2017 mövsümündəki göstəricinin təkrarıdır. Həmin vaxt "Qarabağ" da dörd turdan sonra yeddi xal toplamışdı. Rekord isə Konfrans Liqasının 2021/2022 mövsümünə məxsusdur - ağdamlılar ilk dörd oyunda maksimum 10 xal qazanmışdılar.
Az əhəmiyyətli olmayan digər göstərici isə vurulan qolların sayıdır. 2025/2026 mövsümündə "Qarabağ" Çempionlar Liqasının ilk dörd turunda "Benfika" (3:2), "Kopenhagen" (2:0), "Atletik"(Bilbao) (1:3) və "Çelsi" (2:2) ilə oyunlarda fərqlənərək səkkiz qol vurub. Bu, klub tarixində rekord göstərici sayılır və Konfrans Liqasının 2021/2022 mövsümündəki nəticəni təkrarlayır. Həmin mövsümdə də ağdam təmsilçisi turnirin eyni mərhələsində səkkiz qol vurmuşdu.
Qeyd etmək vacibdir ki, hazırkı göstəricilər Avropanın ən nüfuzlu klub turniri olan Çempionlar Liqasında əldə edildiyindən, onların dəyəri Avropa Liqası və Konfrans Liqasındakı nəticələrdən qat-qat yüksəkdir.
Beləliklə, cari mövsüm artıq "Qarabağ"ın Avrokubok tarixində ən uğurlu startlardan biri kimi yadda qalıb. Komanda təkcə xal sayında əvvəlki göstəricisini təkrarlamayıb, həm də vurulan qollar baxımından öz rekorduna bərabərləşib.
"Çelsi", "Benfika", "Kopenhagen" və "Atletik"(Bilbao) kimi səviyyəli rəqiblər fonunda bu göstəricilər "Qarabağ"ın inkişaf miqyasını və Çempionlar Liqasının pley-off mərhələsinə yüksəlmək uğrunda mübarizəyə tam hazır olduğunu bir daha təsdiqləyir.
Teymur Tuşiyev
