Sport24.az
"Qarabağ"ın UEFA Çempionlar Liqasının əsas mərhələsində bu gün üz-üzə gələcəyi İngiltərənin "Çelsi" klubu son üç mövsümdə transferlərə 1,5 milyard funt sterlinqdən çox pul xərcləyib.
Spor24.az-ın məlumatına görə, London təmsilçisində hazırkı heyətin bazar dəyəri də 1 milyarddan çoxdur.
Bəs "Qarabağ"da bu rəqəmlər necədir? Azərbaycan çempionunun heyətinin dəyəri 22 milyon funt sterlinqdən aşağıdır. "Köhlən atlar" son beş mövsümdə transferlərə cəmi 7 milyon xərcləyiblər.
"Zadəganlar"ın futbolçularının maaşları da müqayisə olunmayacaq dərəcədə çoxdur. Ris Ceyms həftəlik 250 min, Vesle Fofana 200 min, Entso Fernandes 180, Mark Kukurelya 175, Kol Palmer isə 130 min funt sterlinq məvacib alırlar. Nəzərə alaq ki, bunlar oyunçuların həftəlik maaşıdır.
Bütün bunlara baxmayaraq "Qarabağ"ın baş məşqçisi Qurban Qurbanov da ötən gün mətbuat konfransında büdcə məsələlərinə toxunub. 53 yaşlı mütəxəssis heç vaxt büdcəyə diqqət yetirmədiyini vurğuladı: Heç vaxt düşünməmişəm ki, bu klubun büdcəsi çoxdur, məndə azdır, mən ondan yaxşı nəticə verirəm. Belə düşünməmişəm. Hamıya hörmət edirəm. Düşdüyümüz duruma uyğun hərəkət edib, bundan maksimum istifadə etmək istəyirik. İndi hansısa uğur əldə etməyə imkanımız varsa, işgüzarlıq gücünə əldə etmək istəyirəm. Bu, daha ləzzətli olur".
Qeyd edək ki, bu gün Tofiq Bəhramov adına Respublika stadionunda keçiriləcək "Qarabağ" - "Çelsi" oyunu saat 21:45-də başlayacaq.
