Idman.biz
İspaniya mətbuatı "Qarabağ"ın Çempionlar Liqasında ardıcıl ikinci qələbəsinə toxunaraq, 22 oktyabrda "San Mames" stadionunda keçiriləcək qarşılaşmanı "Atletik" (Bilbao) üçün ciddi sınaq adlandırıb.
İdman.biz xəbər verir ki, yerli DEIA nəşri "Qarabağ" "Atletik"i xəbərdar edir" başlıqlı yazı dərc edib və vurğulayıb ki, Azərbaycan klubu Bilbaoya "Kopenhagen" üzərində 2:0 hesablı inamlı qələbədən sonra gəlir.
Nəşr qeyd edir ki, "Qarabağ" "Benfika"ya qarşı qələbənin təsadüfi olmadığını sübut edib və komanda güclü Avropa rəqiblərinə qarşı da yüksək nəticələr qazanmaq potensialına malikdir.
Öz növbəsində, Diario AS nəşri Ağdam təmsilçisinin ilk iki turdakı qələbələri fonunda "Qarabağ"ın Çempionlar Liqasının yeni mərhələ sistemində turnir cədvəlində üst pillələrdə yer aldığını yazır. Qəzet vurğulayır ki, iki turun nəticəsinə görə komanda ilk "8-liyə" daxil olub, "Atletik" isə hələlik pley-off zonasından kənardadır.
Qeyd edək ki, "Atletik" iki turun ardından xal qazana bilməyib və turnir cədvəlində 34-cü pillədə qərarlaşıb. Bilbao təmsilçisi ikinci turda səfərdə Dortmund "Borussiya"sına 1:4 hesabı ilə məğlub olub, ilk turda isə London "Arsenal"ına 0:2 hesabı ilə uduzub.
Ümumilikdə, İspaniya mediası hesab edir ki, Ağdamın "Qarabağ" klubuna məğlubiyyət "Atletik"in Çempionlar Liqasının pley-off mərhələsinə yüksəlmək ümidlərini faktiki olaraq məhv edəcək.
Yuxarıda qeyd olunduğu kimi, "Atletik" və "Qarabağ" arasında oyun 22 oktyabr tarixində keçiriləcək və Bakı vaxtı ilə saat 20:45-də başlayacaq.
Teymur Tuşiyev
