Idman.biz
Bu gün "Qarabağ" UEFA Çempionlar Liqasının qrup mərhələsində üçüncü oynuna çıxacaq.
İdman.Biz xəbər verir ki, "Qarabağ"ın rəqibi Bilbao təmsilçisi "Atletik"dir. Bu komanda İspaniya futbolunun nəhənglərindən sayılmasa da, avrokuboklarda böyük təcrübəyə malikdir. 2011/12 mövsümündə Avropa Liqasının finalına qədər yüksəlmiş, lakin Madrid "Atletiko"suna 0:3 hesabı ilə uduzmuşdu.
Bask təmsilçiləri Çempionlar Liqasına bu mövsüm uğursuz başlayıblar: Londonun "Arsenal" klubuna (0:2), Dortmunda "Borusiya"sına (1:4) məğlubiyyət. Amma "Qarabağ" qrup mərhələsinə ideal şəkildə başlayıb - səfərdə Lissabon "Benfika"sını 3:2, evdə isə Danimarkanın "Kopenhagen" klubunu 2:0 hesabı ilə məğlub edib.
Xatırladaq ki, bu, Ağdam klubunun Çempionlar Liqasında ikinci səfər oyunudur. Və növbəti qarşılaşma ola bilsin üslub baxımından "köhlən atlar" üçün Lissabondakından fərqli olsun.
"Atletik"in ÇL-də və İspaniya Liqasındakı uğursuzluqlarına baxmayaraq, basklar "San Mames" stadionunda daha inamlı çıxış edir – bu mövsüm burada üç qələbə qazanıblar, bir dəfə heç-heçə edib, bir dəfə də uduzublar. Oyun tərzlərinə gəldikdə isə, cinahlardan çox hücum edirlər və dəqiq ötürmələrin sayına görə La Liqanın lider komandalarındandırlar. Yəni biz cinahlardan cərimə meydançasına daha çox ötürmə izləyəcəyik. Bu isə o deməkdir ki, "Qarabağ" cərimə meydanı ətrafında qaydaları pozmadan həm hava, həm də fiziki mübarizələri uduzmamalıdırlar.
"Atletik"in üstünlükləri
Rəqibin "açar" oyunçuları arasında Uilyams qardaşları xüsusi seçilir. Sol cinah hücumçusu Niko Uilyams La Liqada 90 dəqiqə ərzində ən çox uğurlu driblinq edən oyunçular arasındadır və təhlükəli sürətli çıxışları ilə tanınır. Böyük qardaşı İnyaki Uilyams isə rəqib arxasına sızması ilə fərqlənir. Cərimə meydanında Qorka Quruzeta aktivdir, ötürmələri və hava toplarını tamamlayır. Oihan Sanset xətlərarası əlaqəni birləşdirən və son ötürmələrdən məsul oyunçudur. Aleks Berenger isə sol cinahdan daimi və kəskin ötürmələr edir. Təcrübəli müdafiəçi Aymerik Laportun qayıdışı isə standart vəziyyətlərdə komandanın gücünü artırıb.
"Qarabağ" nə etməlidir?
"Benfika" ilə oyunda "Qarabağ"ın oyun və yekun zərbələr üçün daha böyük sahəsi vardı. Amma Bilbaoda vəziyyət fərqli ola bilər: mərkəzdə daha az boşluq, kənarlarda daha çox ikili mübarizə və cərimə meydanına çoxlu ötürmələr gözlənilir.
"Qarabağ" üçün əsas məqsəd cinahları bağlamaqdır. Kənar müdafiəçi ilə dayaq yarımmüdafiəçi arasında sıx əlaqə olmalı, ötürmə vaxtı azaldılmalı, cərimə meydanı ətrafında ehtiyatlı şəkildə sığortalama təmin olunmalıdır. Cərimə meydançasının küncündə artıq-əskik kobudluqlardan uzaq olmaq vacibdir - "Atletik" standart vəziyyətləri yaxşı yerinə yetirir, ona görə də belə halların qarşısını mövqe oyunu ilə almaq daha düzgündür. Qapı qarşısında intizama xüsusi diqqət yetirilməlidir. Təkcə ilk topun uzaqlaşdırılması yox, həm də "ikinci top"un dərhal ələ keçirilməsi vacibdir.
Yekun olaraq...
Ehtimal ki, basklar tempi artırmağa və "Qarabağ"ı fiziki baxımdan tükəndirməyə çalışacaqlar. Bu zaman Ağdam təmsilçisinə oyunun ritmini aşağı salmaq üçün itkisiz 2-3 qısa ötürmə etmək, rəqibin oyun planını pozmaq lazımdır.
Bilbaoda "Qarabağ" üçün açıq sahələr az olacaq, fiziki və hava mübarizələri çox olacaq. Qurban Qurbanovun komandası daha çox dözümlülük və təzyiqə davamlılıq göstərməli olacaq, nəinki Lissabonda olduğu kimi açıq oyun nümayiş etdirmək.
Amma nizam-intizam və cinahlarda ağıllı oyun "Qarabağ"a rəqibin hücumlarının qarşısını almağa və imkan düşdükdə səhvlərdən yararlanaraq qol vurmağa şərait yarada bilər. Bu mövsüm Çempionlar Liqasında "Qarabağ" artıq sübut edib ki, Avropanı təəccübləndirməyi bacarır. Bəlkə bu dəfə də Bilbaoda eyni şey təkrarlanacaq.
Teymur Tuşiyev
