“Qarabağ” antirekorda doğru: 5 qoldan sonrakı 5 oyunluq həsrət

"Qarabağ"ın avrokuboklardakı uğursuz seriyası davam edir.

İdman.biz xəbər verir ki, Azərbaycan çempionu ev oyunlarında qara zolağa düşüb.

Qurban Qurbanovun yetirmələri öz meydanında keçirdiyi son 5 matçın hamısında uduzub. Bu seriya Çempionlar Liqasının III təsnifat mərhələsindən başlayıb.

İkinci raundda Cəbəllütariq "Linkoln"una 5 cavabsız qol vuran "Qarabağ" sonrakı 5 qarşılaşmada azarkeşlərinə yalnız üzüntü bəxş edib. Öncə "Lüdoqorets", ardınca Zaqreb "Dinamo"su Bakıdan qalib ayrılmağın sevincini yaşayıb.

Avropa Liqasında da ölkəmizin qonaqları qələbələri sıralayıblar. Öncə "Malmö" "Qarabağ"ı məğlub edib. Son iki görüş daha acınacaqlı olub. Həm "Ayaks", həm "Lion" böyükhesablı nəticə qazanıb.

Bu darmadağınlardan sonra ev oyunlarındakı məğlubiyyət seriyası 5-ə çatıb. Bu da Azərbaycan klublarının avrokuboklardakı çıxışları dövründə ikinci ən acınacaqlı seriyadır.

2024/25 mövsümü
Çempionlar Liqası
"Qarabağ" – "Lüdoqorets" – 1:2
"Qarabağ" – "Dinamo" Z – 0:2
Avropa Liqası
"Qarabağ" – "Malmö" – 1:2
"Qarabağ" – "Ayaks" – 0:3
"Qarabağ" – "Lion" – 1:4

Antirekordun özü də Ağdam təmsilçisinə məxsusdur. Hazırda həmin antirekordun iki addımlığında olan "Qarabağ" tarixinin ilk ev qələbəsinə qədər uzun illər gözləməli olub.

"Rusenborq" üzərində 2009-cu ildə əldə olunan qalibiyyət "Qarabağ"ın avrokuboklardakı 8-ci ev görüşünə təsadüf edib. Bunadək isə istisnasız məğlubiyyətlər sıralanıb.

1996-cı ildəki debütdən başlayaraq ardıcıl 7 ev oyununda uduzan "Qarabağ"ın həmin antirekordu hələ təkrarlanmayıb. Qurbanovun komandası həmin seriyaya yaxınlaşmamaq üçün FCSB ilə görüşdə qələbə, ən azı heç-heçəyə imza atmalıdır.

Düzdür, yeddi məğlubiyyətdən ibarət seriyanın son görüşündə əlavə vaxt oynanılıb. 90 dəqiqəsi heç-heçə bitən qarşılaşmadakı yenilgi sonrakı 30 dəqiqəyə təsadüf edib. UEFA reytinqinə və digər ümumi cədvəllərə də məhz 120 dəqiqənin nəticəsi nəzərə alındığı üçün Moldova klubu ilə görüşdə ardıcıl 7-ci ev məğlubiyyəti qeydə alınıb.

1996/97 mövsümü
Kuboklar kuboku
"Qarabağ" – "MüPA" – 0:1
1997/98 mövsümü
UEFA kuboku
"Qarabağ" – "Yablonets" – 0:3
1998/99 mövsümü
Kuboklar kuboku
"Qarabağ" – "Kopenhagen" – 0:4
1999/2000 mövsümü
İntertoto kuboku
"Qarabağ" – "Makkabi" H – 0:1
"Qarabağ" – "Monpelye" – 0:3
2004/05 mövsümü
UEFA kuboku
"Qarabağ" – "Dukla" BB – 0:1
2006/07 mövsümü
UEFA kuboku
"Qarabağ" – "Zimbru" – 1:2